බෙංගාල බොක්ක මුහුදු ප්‍රදේශයේ වර්ධනය වී ඇති "ඔර්නබ්" නමැති සුළි කුණාටුව හේතුවෙන් දිවයින වටා වන මුහුදු ප්‍රදේශ සහ බෙංගාල බොක්ක මුහුදු ප්‍රදේශය සඳහා කාලගුණ විද්‍යා දෙපාර්තමේන්තුවේ ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය විසින් රතු නිවේදනයක් නිකුත් කර තිබේ.

අද (26) රාත්‍රී 08.00 ට නිකුත් කරන ලද මෙම නිවේදනයට අනුව, අද පස්වරු 2.30 වන විට "ඔර්නබ්" සුළි කුණාටුව කන්කසන්තුරයේ සිට කි.මී. 1,050 පමණ ඊශාන දෙසින් (උතුරු අක්ෂාංශ 15.5° සහ නැගෙනහිර දේශාංශ 87.8° ආසන්නයේ) කේන්ද්‍රගතව පැව ඇත.

බටහිරට බරව වයඹ දෙසට ගමන් කරනු ඇතැයි අපේක්ෂිත මෙම පද්ධතිය, බටහිර - මධ්‍යම බෙංගාල බොක්ක මුහුදු ප්‍රදේශයේදී තවදුරටත් වර්ධනය වී චණ්ඩ සුළි කුණාටුවක් බවට පත්වනු ඇතැයි පුරෝකථනය කර ඇත.

අනතුරුව, හෙට (27) වන විට එය ඉතා චණ්ඩ සුළි කුණාටුවක් බවට පත්වී, ඔක්තෝබර් 28 වන දින පෙ.ව. 11.30 පමණ වන විට අන්ද්‍රා ප්‍රදේශය හරහා ඉන්දියානු වෙරළ තීරයට ඇතුල් වනු ඇතැයි අපේක්ෂා කෙරේ.

බහු දින ධීවර යාත්‍රා සඳහා විශේෂ අනතුරු ඇඟවීම්

මෙම තත්ත්වය හේතුවෙන් උතුරු අක්ෂාංශ 10 ත් 20 ත් සහ නැගෙනහිර දේශාංශ 80 ත් 95 ත් අතර මුහුදු ප්‍රදේශවල සුළගේ වේගය විටින් විට පැ.කි.මී. 80-100 දක්වා ඉහළ යා හැකි අතර, මුහුදු රළ මීටර් 3.0 - 4.0 දක්වා ඉහළ යමින් එම ප්‍රදේශ ඉතා රළු විය හැක.

එබැවින්, නැවත දැනුම් දෙන තුරු ඉහත සඳහන් මුහුදු ප්‍රදේශවල ධීවර හා නාවික කටයුතුවලින් සම්පූර්ණයෙන් වළකින ලෙසත්, දැනට එම ප්‍රදේශවල යෙදී සිටින ප්‍රජාව වහාම ආරක්ෂිත ප්‍රදේශ කරා ගමන් කරන ලෙසත් දැඩිව උපදෙස් දී ඇත.

දිවයින වටා ගැඹුරු හා නොගැඹුරු මුහුදු ප්‍රදේශවල තත්ත්වය

කොළඹ සිට ගාල්ල, මාතර, හම්බන්තොට, පොතුවිල්, මඩකලපුව හරහා මුලතිව් දක්වා වන ගැඹුරු සහ නොගැඹුරු මුහුදු ප්‍රදේශවල සුළඟේ වේගය විටින් විට පැ.කි.මී. 60-65 දක්වා ඉහළ යා හැකි අතර, දිවයින වටා සෙසු මුහුදු ප්‍රදේශද විටින් විට රළු විය හැක.

පුත්තලම සිට කොළඹ, ගාල්ල සහ මාතර හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල මුහුදු රළ මීටර් 2.0 - 2.5 පමණ ඉහළ යාමේ හැකියාවක් පවතී.

ගිගුරුම් සහිත වැසි ඇති වන අවස්ථාවලදී අදාළ මුහුදු ප්‍රදේශවල තාවකාලිකව තද සුළං (පැ.කි.මී. 60-70) ඇති විය හැකි අතර, එම ප්‍රදේශ තාවකාලිකව ඉතා රළු විය හැක.

ධීවර සහ නාවික ප්‍රජාව මේ සම්බන්ධයෙන් දැඩි අවධානයෙන් යුතුව කටයුතු කරන ලෙස කාලගුණ විද්‍යා දෙපාර්තමේන්තුව වැඩිදුරටත් ඉල්ලා සිටී.