ඇද හැලෙන අධික වර්ෂාපතනයත් සමග වාරිමාර්ග දෙපාර්තමේන්තුව මගින් පාලනයවන ප්‍රධාන ජලාශ 17ක් සහ මධ්‍ය පරිමාණ ජලාශ 13කට අධික සංඛ්‍යාවක් මේ වනවිට වාන් දමමින් පවතින බව වාරිමාර්ග දෙපාර්තමේන්තුව පවසයි.
නිවේදනයක් නිකුත් කරමින් එම දෙපාර්තමේන්තුවේ වාරිමාර්ග අධ්‍යක්ෂ (ජල කළමනාකරණ) ඉංජිනේරු එච්.එම්.පී.එස්.ඩී. හේරත් මහතා පවසා සිටියේ, මේ හේතුවෙන් ජලාශ වෙත ලැබෙන ජල ධාරිතාව මත ඉදිරියේදී වාන දොරටු විවෘත තැබීමේ ප්‍රමාණයන් වෙනස් විය හැකි බවය.
මේ හේතුවෙන් වාරිමාර්ග දෙපාර්තමේන්තුව සහ ආපදා කළමනාකරණ අංශය විසින් නිකුත් කරනු ලබන නිවේදන පිළිබඳව නිරන්තරයෙන් අවධානයෙන් පසුවන ලෙසත්, ජලාශවල පහළ ප්‍රදේශවල සහ ගංගා දෙපස පදිංචි මහජනතාව ජල මට්ටම් පිළිබඳව විමසිලිමත්ව කටයුතු කරන ලෙසත් වාරිමාර්ග දෙපාර්තමේන්තුව ඉල්ලා සිටී.
දැදුරුඔය ජලාශය -
වාන් දොරටු 8ක් අඩි 3 බැගින් විවෘත කර ඇති අතර, තත්පරයට ඝන අඩි 15,700ක ජල ප්‍රමාණයක් දැදුරුඔයට නිකුත් කෙරේ.
රාජාංගනය ජලාශය -
වාන් දොරටු 10ක් අඩි 4 බැගින් විවෘත කර ඇති අතර, තත්පරයට ඝන අඩි 8,880ක ජල ප්‍රමාණයක් නිකුත් කෙරේ.
අංගමුව ජලාශය -
වාන් දොරටු 2ක් අඩි 4 බැගින් විවෘත කර තත්පරයට ඝන අඩි 2,440ක ජල ප්‍රමාණයක් කලාවැව දෙසට නිකුත් කෙරේ.
තබ්බෝව ජලාශය -
වාන් දොරටු 8ක් අඩි 2 බැගින් විවෘත කර තත්පරයට ඝන අඩි 3,520ක ජල ප්‍රමාණයක් නිකුත් කෙරේ.
ඉඟිනිමිටිය ජලාශය -
වාන් දොරටු 2ක් අඩි 2 බැගින් සහ තවත් වාන් දොරටු 2ක් අඩිය බැගින් විවෘත කර තත්පරයට ඝන අඩි 2,000කට අධික ජල ප්‍රමාණයක් මී ඔය වෙත නිකුත් කරමින් පවතී.
