මෙරට ධීවර කර්මාන්තය නඟාසිටුවීම අරමුණු කරගනිමින් ජපාන ජාත්‍යන්තර සහයෝගිතා ආයතනය (JICA) සමඟ විශේෂ සහයෝගිතා ගිවිසුමකට එළඹීමට මේ වන විට කටයුතු සම්පාදනය කර ඇත.
මෙහි මූලික පියවරක් ලෙස ධීවර ක්ෂේත්‍රයේ ප්‍රධානතම ගැටලුවක් වන 'පසු අස්වනු හානිය' පිළිබඳ අවශ්‍යතා ඇගයීමක් (Needs Assessment) මේ වන විටත් සිදු කර අවසන්ව තිබේ.
එම අවශ්‍යතා ඇගයීමේ ප්‍රතිඵල මත පදනම්ව, වෙරළබඩ (coastal) සහ ගැඹුරු මුහුදු (deep sea) ධීවර කර්මාන්තය තුළ "පසු අස්වනු සහ ශීත දාම සංවර්ධනය කිරීම" (Post-harvest and cold chain development) සම්බන්ධයෙන් ව්‍යාපෘති යෝජනාවලියක් (proposal) සකස් කිරීමට ඔවුන් තීරණය කර ඇත.
මෙම යෝජනාවලිය සම්බන්ධයෙන් වැඩිදුරටත් සක්‍යතා අධ්‍යයනයක් සිදු කිරීම සඳහා පසුගියදා (22) දින ධීවර, ජලජ හා සාගර සම්පත් අමාත්‍යාංශයේ ලේකම් ආචාර්ය බී.කේ. කෝලිත කමල් ජිනදාස මහතාගේ ප්‍රධානත්වයෙන් පැවති සාකච්ඡාවේදී එකඟතාවකට පැමිණ තිබේ.
ඒ අනුව, අදාළ දත්ත රැස්කිරීමේ සක්‍යතා අධ්‍යයනය එළඹෙන නොවැම්බර් මාසයේ සිට පෙබරවාරි 28 වැනිදා දක්වා මාස කිහිපයක් පුරා ක්‍රියාත්මක කිරීමට සැලසුම් කර ඇත.
දිවයින වටා පිහිටි වෙරළබඩ සහ ගැඹුරු මුහුදු ධීවර කලාප නියෝජනය වන පරිදි තෝරාගත් ප්‍රදේශ කේන්ද්‍ර කරගනිමින් මෙම සමීක්ෂණය දියත් කිරීමට නියමිතය.
මෙම මූලික සක්‍යතා අධ්‍යයනය මඟින් වෙරළබඩ සහ ගැඹුරු මුහුදු ධීවර කටයුතු වලදී සිදුවන මත්ස්‍ය සම්පත අපතේ යාම සහ ඊට බලපාන හේතු නිවැරදිව තක්සේරු කරනු ඇත.
අදාළ සක්‍යතා අධ්‍යයනය සාර්ථකව අවසන් කිරීමෙන් පසුව, එමඟින් ලබාගන්නා දත්ත, අවසන් වාර්තා සහ නිර්දේශ මත පදනම්ව සීමිත අස්වැන්නකින් ඉහළ වටිනාකමක් නිර්මාණය කිරීමට අදාළව මෙම ප්‍රධාන ව්‍යාපෘතිය නිල වශයෙන් ක්‍රියාත්මක කිරීමට නියමිතය.
ඒ හරහා ජපානයේ දියුණු තාක්ෂණික ක්‍රමවේද මෙරට ධීවර කර්මාන්තයට හඳුන්වා දීමේ අනාගත සැලසුම් ක්‍රියාවට නැංවීමට ධීවර, ජලජ හා සාගර සම්පත් අමාත්‍යාංශය අපේක්ෂා කරයි.
