ළමා යහපැවැත්ම වෙනුවෙන් ගෝලීය ආයෝජන ශක්තිමත් කිරීමේ සමර්කන්ද් ලෝක සමුළුව උස්බෙකිස්ථානයේ සමර්කන්ද් නගරයේදී පසුගිය 21 සහ 22 දෙදින පැවැත්විණි.
ඒ සඳහා මෙරට නියෝජනය කරමින් කාන්තා සහ ළමා කටයුතු නියෝජ්‍ය අමාත්‍ය නාමල් සුදර්ශන මහතා එක්ව ඇත.
“Investing in Children’s Wellbeing: A Path to Sustainable and Equitable Development for Future Generations” යන තේමාවෙන් පැවැති මෙම සමුළුවට රටවල් 100කට අධික සංඛ්‍යාවක නියෝජිතයින් 600කට වැඩි පිරිසක් සහභාගී වූහ.
රාජ්‍ය ප්‍රතිපත්ති සම්පාදකයින්, එක්සත් ජාතීන්ගේ සංවිධානය ඇතුළු ජාත්‍යන්තර සංවිධානවල නියෝජිතයින් සහ ළමා අයිතිවාසිකම් පිළිබඳව විශේෂඥයින් මෙම අවස්ථාවට එක් විය.
දරුවන්ගේ යහපැවැත්ම වෙනුවෙන් වෙන් කරන සම්පත් වියදමක් ලෙස නොව අනාගත පරපුරේ මානව සංවර්ධනය හා තිරසර සංවර්ධනය උදෙනා කරන ආයෝජනයක් ලෙස සැලකීමේ වැදගත්කම මෙහිදී අවධාරණය විය.
එමෙන්ම ආබාධ සහති දරුවන්, පවුල් රැකවරණය අහිමි දරුවන් සහ සමාජීය වශයෙන් අවදානමට ලක්වන දරුවන්ගේ අයිතිවාසිකම් ආරක්ෂා කිරීම පිළිබඳවද මෙහිදී සාකච්ඡා කෙරිණි.
සමුළුවට සමගාමීව ළමා පිළිකා පිළිබඳ දෙවන ජාත්‍යන්තර කොංග්‍රසය ද පැවැත්වුණු අතර, ළමා පිළිකා සඳහා ප්‍රතිකාර සේවා, අත්‍යවශ්‍ය ඖෂධ සඳහා ප්‍රවේශය සහ රෝගී දරුවන්ගේ ජීවන තත්ත්වය ඉහළ නැංවීම පිළිබඳව ද අවධානය යොමු විය.
සමුළුවේ ප්‍රධාන ප්‍රතිඵලයක් ලෙස දරුවන්ගේ යහපැවැත්ම වෙනුවෙන් ආයෝජනය කිරීම පිළිබඳ සමර්කන්ද් ප්‍රකාශනය සම්මත කරගැනීම තුළින් දරුවන්ගේ අයිතිවාසිකම් සහ යහපැවැත්ම වෙනුවෙන් ජාත්‍යන්තර කැපවීම් ජාතික මට්ටමේ ක්‍රියාමාර්ග බවට පරිවර්තනය කිරීමේ වැදගත්කම ද මෙහිදී තවදුරටත් අවධාරණය කෙරිණි.
මෙම සමුළුවට ශ්‍රී ලංකාව නියෝජනය කරමින් නියෝජ්‍ය අමාත්‍යවරයාගේ සහභාගිත්වය, ළමා ආරක්ෂණය හා සංවර්ධනය සම්බන්ධ ජාත්‍යන්තර අත්දැකීම් හුවමාරු කරගැනීමටත්, දරුවන්ගේ යහපැවැත්ම තහවුරු කිරීම සඳහා ජාත්‍යන්තර සහයෝගීතාව ශක්තිමත් කිරීමටත් වැදගත් අවස්ථාවක් විය.
