ජාතික වස්තුවක් වූ "කාවන්තිස්ස" හස්තියාගේ අවාසනාවන්ත වියෝව පිළිබඳව රජය දැඩි කම්පාවට පත්වන බවත්, මෙවැනි පාරිසරික අපරාධ සිදුකරන පුද්ගලයින්ට එරෙහිව තරාතිරම නොබලා පරිසර නීතිය දැඩිව ක්‍රියාත්මක කරන බවත් අග්‍රාමාත්‍ය ආචාර්ය හරිනි අමරසූරිය ප්‍රකාශ කළාය.
අග්‍රාමාත්‍යවරිය මේ බව ප්‍රකාශ කළේ පරිසර අමාත්‍යාංශය යටතේ ක්‍රියාත්මක මධ්‍යම පරිසර අධිකාරිය මගින් 11 වන වරටත් බණ්ඩාරනායක ජාත්‍යන්තර සම්මන්ත්‍රණ ශාලාවේදී අද (19) සංවිධානය කරන ලද "ජනාධිපති පරිසර සම්මාන 2026" සම්මාන ප්‍රදානෝත්සවය අමතමිනි.
ස්වාභාවික සම්පත් තිරසාර ලෙස කළමනාකරණය කළ ආයතන ඇගයීම වෙනුවෙන් මෙහිදී රන්, රිදී, ලෝකඩ සහ කුසලතා සම්මාන 195ක් ප්‍රදානය කෙරිණි.
රටක් පොහොසත් වන්නේ ආර්ථික දර්ශකවලින් පමණක් නොවන බවත්, පිරිසිදු වාතය, පානීය ජලය සහ සෞඛ්‍ය සම්පන්න පරිසර පද්ධතියක් පැවැතීමත් ජනතාවගේ ජීවිත සුන්දර වීමට අත්‍යවශ්‍ය බවත් ඇය පෙන්වා දුන්නාය.
කාවන්තිස්ස හස්තියාගෙන් පසු යළි මෙවැනි ඛේදවාචක සිදු වීමට ඉඩ නොදෙන බවත්, තනතුර, ධනය හෝ වෙනත් බලපෑම් මත පරිසර නීතිය වෙනස් නොවන බවත් ඇය අවධාරණය කළාය.
ව්‍යාපෘති අනුමත කිරීම් සහ බලපත්‍ර නිකුත් කිරීම් විද්‍යාත්මක සාක්ෂි සහ පූර්ණ විනිවිදභාවයකින් යුතුව සිදුවිය යුතු බවත්, පරිසරය විනාශ කර සිදුකරන කිසිදු සංවර්ධනයක් තිරසාර නොවන බවත් සඳහන් කළ අගමැතිනිය, අනාගතයේදී මෙවැනි සිදුවීම් වැළැක්වීම සඳහා වනසතුන්ට වෛද්‍ය ප්‍රතිකාර ලබාදීමේ වැඩපිළිවෙළ සහ පශු වෛද්‍ය අධ්‍යාපනය තවදුරටත් ශක්තිමත් කරන බව පැවසුවාය.
දිර්ඝකාලීන අලි-මිනිස් ගැටුම විසඳීම සඳහා වනාන්තර 113ක් රක්ෂිත බවට පත් කරමින් හෙක්ටයාර 71,900ක් ආරක්ෂිත භූමි ලෙස නම් කර ඇති අතර, අලිමංකඩ 3ක් සහ අලි කළමනාකරණ රක්ෂිතයක්ද ස්ථාපිත කරමින් පවතී.
වනජීවී සංරක්ෂණ දෙපාර්තමේන්තුවේ ක්ෂේත්‍ර කටයුතු නංවාලීම සඳහා නව වාහන සහ උපකරණ ලබා දී ඇති අතර, වසර 26කට පසු පරිසර පනත සංශෝධනය කර නව නිලධාරීන් 1,600කට අධික පිරිසක් බඳවා ගැනීමට කටයුතු කරමින් සිටී.
කුඩා හා මධ්‍ය පරිමාණ ව්‍යාපාරිකයන් හරිත තාක්ෂණයට යොමු කිරීමටත්, පාසල් සහ විශ්වවිද්‍යාල අධ්‍යාපනය තුළ ප්‍රායෝගික පරිසර කුසලතා දිරිමත් කිරීමටත් රජය කටයුතු කරන බව ඇය වැඩිදුරටත් කියා සිටියාය.
