ඉන්දියාවේ සිට මෙරටට මුහුදු මාර්ගයෙන් මත්ද්‍රව්‍ය එවීමට සැලසුම් කළ, තමිල්නාඩු මහ ඇමති ජෝසෆ් විජේගේ නායකත්වයෙන් යුත් තමිළග වෙට්ට්‍රි කලගම් (TVK) පක්ෂයේ ක්‍රියාකාරිකයෙකු ඇතුළු පුද්ගලයන් සිව්දෙනෙකු එරට බුද්ධි අංශ විසින් අත්අඩංගුවට ගෙන තිබේ.
මෙටම්පෙටමින් (Methamphetamine) නම් මත්ද්‍රව්‍ය කිලෝග්‍රෑම් 100ක් ඔවුන් සතුව තිබී සොයාගෙන ඇති බව ඉන්දීය මාධ්‍ය පවසයි.
අත්අඩංගුවට ගත් පිරිස අතර සිටින TVK පක්ෂ ක්‍රියාකරු තමිල්නාඩු ප්‍රාන්තයේ නාගපතිනම් දිස්ත්‍රික් විධායක කමිටු සාමාජිකයෙකුවන එන්. භූපාලන් නම් 42 හැවිරිදි පුද්ලගයෙක්ය.
නාගපතිනම් සිට ශ්‍රී ලංකාවට මත්ද්‍රව්‍ය ජාවාරම් කරන බවට ලද රහසිගත තොරතුරක් මත, ඉන්දීය ආරක්ෂක අංශ ඊයේ (16) උදෑසන 6.00 පමණ එක් සැකකරුවෙකුගේ නිවසක් වටලා පරීක්ෂා කර ඇත.
එහිදී ලද තොරතුරු මත මෙම මත්ද්‍රව්‍ය ජාවාරමේ මහ මොළකරු ලෙස සැලකෙන භූපාලන්ගේ නිවස තවත් නිලධාරී කණ්ඩායමක් පරීක්ෂා කිරීමේදී මෙම මත්ද්‍රව්‍ය තොගය හමුවී ඇත.
භූපාලන්ගේ බිරිඳ ශ්‍රී ලංකිකයෙකු වීම මෙම ජාවාරම සඳහා උපකාරී වන්නට ඇති බව නිලධාරීන් සැකපළ කර තිබේ.
චෙන්නායි සිට රැගෙන එන ලද මෙම මත්ද්‍රව්‍ය තොගය තමිල්නාඩුවේ විවිධ ප්‍රදේශවල බෙදා හැරීම සඳහා රඳවාගෙන ඇති බවටද විමර්ශනවලදී හෙළි වී තිබේ.
සෝදිසි කිරීම් සහ ප්‍රශ්න කිරීම්වලින් අනතුරුව සැකකරුවන් සහ ආරක්ෂක අංශ භාරයට ගත් මත්ද්‍රව්‍ය තොය වැඩිදුර පරීක්ෂණ සඳහා නාගපතිනම් රේගු කාර්යාලය වෙත රැගෙන ගොස් ඇත.
මේ අතර මත්ද්‍රව්‍ය ජාවාරමට සම්බන්ධ වීම සහ පක්ෂ ප්‍රතිපත්තිවලට පටහැනිව කටයුතු කිරීම හේතුවෙන් භූපාලන්, පක්ෂයේ මූලික සාමාජිකත්වයෙන් සහ සියලු තනතුරුවලින් වහාම ඉවත් කළ බව TVK නාගපතිනම් දිස්ත්‍රික් ලේකම් එම්. සුගුමරන් නිවේදනය කර ඇති බවද ඉන්දීය මාධ්‍ය පවසා තිබේ.
