සිරිලිය සවිය ගිණුමේ චෝදනා සම්බන්ධයෙන් රිමාන්ඩ් භාරයේ සිටි ශිරන්ති රාජපක්ෂ මහත්මිය කොළඹ ප්‍රධාන මහේස්ත්‍රාත් අධිකරණය විසින් අද ඇප මත මුදාහැර තිබේ.

ඒ ඇයගේ රෝගී තත්ත්වය පිළිබඳ වෛද්‍යවරු ලබාදුන් වාර්තාව සුවිශේෂී කරුණක් ලෙස සලකා බැලීමෙන් අනතුරුවය.

ජාතික ඉතිරි කිරීමේ බැංකුවට අයත් රුපියල් මිලියන 10ක් අනීතික ලෙස සිරිලිය සවිය සංවිධානයට ලබාදීමේ සිද්ධිය සම්බන්ධයෙන් වන නඩුව අද (16) යළි කැඳවන ලදී.

එහිදී කොළඹ ජාතික රෝහල ශිරන්ති රාජපක්ෂ මහත්මියගේ රෝගී තත්ත්වය පිළිබඳ වෛද්‍ය වාර්තාවක් අධිකරණයට ඉදිරිපත් කර තිබිණි.

එය පිරික්සූ මහේස්ත්‍රාත්වරයා පැවසුවේ කොළඹ ජාතික රෝහලේ අධ්‍යක්ෂවරයාගේ ආවරණ ලිපියක් සහිතව මෙම වෛද්‍ය වාර්තාව ඉදිරිපත් කර තිබෙන බවය.

මෙම සැකකාරිය "බයිපාස්"  සැත්කමකට ලක්කළ යුතු බව එම වෛද්‍ය වාර්තාවෙන් දන්වා ඇති බවත් මහේස්ත්‍රාත්වරයා විවෘත අධිකරණයේදී සඳහන් කෙරුණි.

පසුව පැමිණිල්ලේ සහ විත්තියේ නීතිඥවරු කළ ඉල්ලීමකට අනුව එම වෛද්‍ය වාර්තාව පරීක්ෂා කිරීම සඳහා දෙපාර්ශ්වයේ නීතිඥවරුන්ට අධිකරණය අවසර ලබාදෙන ලදී.

ශිරන්ති රාජපක්ෂ මහත්මිය වෙනුවෙන් පෙනී සිටි ජනාධිපති නීතිඥ අනිල් සිල්වා මහතා එහිදී සඳහන් කළේ, සැකකාරියගේ වම් කිරීටක ධමනිය සියයට 80 සිට 90 දක්වා අවහිර වීම් දක්නට ඇති බවය.

"ස්වාමීනී.. මෙම වෛද්‍ය වාර්තාව තුළ දක්වා තිබෙනවා සැකකාරියගේ වම් කිරීටක ධමනිය සියයට 80 සිට 90 දක්වා අවහිර වීම් දක්නට ඇති බව. ඇය ඉක්මනින්ම  බයිපාස් සැත්කමකට ලක්කළ යුතු බව. ඇගේ ධමනිවල බරපතළ රෝගී තත්ත්වයක් තිබෙන බව මෙහිදී පෙනී යනවා. ඒ නිසා ඇය අධිකරණයට ඉදිරිපත් කිරීම නුසුදුසු බවයි වෛද්‍යවරු ප්‍රකාශ කර තිබෙන්නේ. ඒ අනුව ඇයට පවතින බරපතළ හෘද රෝගී තත්ත්වය සුවිශේෂී කරුණක් සේ සලකා ඇප නියමකරන මෙන් මා අධිකරණයෙන් ඉල්ලා සිටිනවා."

ඉන් පසු අල්ලස් කොමිසම වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් මහතා ප්‍රකාශ කර සිටියේ, ශිරන්ති රාජපක්ෂ මහත්මිය අවශ්‍ය වෛද්‍ය ප්‍රතිකාර මේ වනවිටත් ලබා දෙන බැවින් මෙය සුවිශේෂි කරුණක් ලෙස සැලකීමට නොහැකි බවය.

"ස්වාමීනී...ඇයගේ හෘදයේ ධමනියක කැල්සියම් බැඳීමක් ගැන සඳහන් වෙනවා. නමුත් මේ අවස්ථාවේදී ඇය ඉන්නේ රෝහලේ හදිසි ප්‍රතිකාර ඒකකයේ. බන්ධනාගාරයේ නෙවෙයි. ඇයට අවශ්‍ය සියලු වෛද්‍ය ප්‍රතිකාර ලබාදෙනවා. ඒ නිසා ඇයගේ රෝගී තත්ත්වය මෙම අවස්ථාවේදී සුවිශේෂී කරුණක් හැටියට සලකන්න බැහැ. මොකද වෛද්‍යවරු මේ වාර්තාවේ සඳහන් කරලා තිබෙනවා ඇයව ප්‍රවාහනය කිරීම නුසුදුසු බව. එසේ නම් ඇයට ඇප දුන්නත් ගෙදර යන්න බැහැ. " එම නිසා අදාළ කරුණ සුවිශේෂී කරුණක් ලෙස සැලකිය නොහැකියි"

සියලු කරුණු සලකා බැලූ මහෙස්ත්‍රාත්වරයා සිය ඇප නියෝගය ප්‍රකාශයට පත් කරමින් කියාසිටියේ, අසනීප තත්ත්වයකින් ජීවිතයට අනතුරක් සිදුවන බව දක්වා තිබේ නම් එය සුවිශේෂී කරුණක් ලෙස නොසලකා සිටිය නොහැකි බවය.

"මෙම සැකකාරිය සම්බන්ධයෙන් වෛද්‍ය වාර්තා දෙකක් අධිකරණයට ලැබී තිබෙනවා. එහි වෛද්‍ය මණ්ඩලය දක්වා තිබෙනවා මෙම සැකකාරියගේ ධමනිවල රුධිර අවහිරවීම් දකින්නට තිබෙන බවට. එය දිගුකාලීනව පැවතියහොත් සිදුවිය හැකි දේ පිළිබඳවත් කරුණු දක්වා තිබෙනවා. මෙම සැකකාරියට එරෙහිව පොදු දේපල පනත යටතේ චෝදනා ඉදිරිපත් කර තිබෙනවා. ඒ යටතේ ඇප ලබාදීම සඳහා සුවිශේෂී කරුණු ඉදිරිපත් කිරීමට අවශ්‍යයි. සුවිශේෂී කරුණු මොනවාද යන්න නීතියේ සඳහන් වෙලා නැහැ. ඒවා ඒ ඒ නඩුවේ අන්තර්ගත කරුණු මත සුවිශේෂී තත්ත්වයන් උද්ගත විය හැකි බව උපරිමාධිකරණ තීන්දුවල සඳහන් වෙනවා. යම් අසනීප තත්ත්වයකින් ජීවිතයට අනතුරක් සිදුවන බව දක්වා තිබේ නම් එය සුවිශේෂී කරුණක් ලෙස නොසලකා සිටිය නොහැකියි."

ඒ අනුව මෙම සැකකාරියට පවතින රෝගී තත්ත්වයන් සුවිශේෂී කරුණු ලෙස අධිකරණය පිළිගන්නා බවත් ඒ අනුව ඇය ඇපමත මුදාහරිණ බවත් මහෙස්ත්‍රාත්වරයා සඳහන් කළේය.

ඒ අනුව සැකකාරිය රුපියල් ලක්ෂයක මුදල් ඇප සහ රුපියල් ලක්ෂ 100 බැගින් වූ ශරීර ඇප දෙකක් මත මුදා හැරීමට නියම කළ මහේස්ත්‍රාත්වරයා සැකකාරියගේ විදේශ ගමන් තහනම් කරන ලෙසත් නියම කරනු ලැබීය.