අමෙරිකා එක්සත් ජනපද රාජ්‍ය දෙපාර්තමේන්තුව විසින් නිකුත් කර ඇති 2026 වසර සඳහා වන මානව ජාවාරම් වාර්තාවට (2026 Trafficking in Persons Report) අනුව, ශ්‍රී ලංකාව තවදුරටත් 'ටියර් 2' (Tier 2) කාණ්ඩය යටතේ වර්ගීකරණය කර තිබේ.
මානව ජාවාරම් මුලිනුපුටා දැමීම සඳහා වන අවම ප්‍රමිතීන් සම්පූර්ණයෙන්ම සපුරා නොමැති වුවද, ශ්‍රී ලංකා රජය ඒ වෙනුවෙන් සැලකිය යුතු උත්සාහයක් දරමින් සිටින බව මෙම වාර්තාව මගින් පෙන්වා දෙයි.
එම වාර්තාවෙන් පෙන්ව දී ඇති, රජය විසින් ගෙන ඇති ධනාත්මක පියවර පහතින් දැක්වේ.
- අපරාධකරුවන්ට එරෙහිව නඩු පැවරීම ඉහළ නැංවීම
- නව රැකවරණ මධ්‍යස්ථානයක් විවෘත කිරීම
- ජාතික ක්‍රියාකාරී සැලැස්මක් හඳුන්වා දීම
- විදේශයන්හි ඔන්ලයින් වංචා මෙහෙයුම්වලට ලක්වීම වැළැක්වීමේ පුහුණු වැඩසටහන්
- නව පනත් සම්මත කිරීම
- බරපතළ අපරාධ මගින් උපයාගත් වත්කම් හඳුනා ගැනීමට සහ අත්පත් කර ගැනීමට 2025 අප්‍රේල් මාසයේදී අපරාධවලින් ලැබුණු ආදායම් පනත (Proceeds of Crime Act) පාර්ලිමේන්තුව විසින් සම්මත කර ගැනීම.
එම වාර්තාවේ සඳහන් පරිදි තවදුරටත් අවධානය යොමු විය යුතු ක්ෂේත්‍ර
- වාර්තාවට අනුව, රජය විසින් වැදගත් ප්‍රගතියක් අත්කර ගෙන තිබුණද, පහත සඳහන් අංශ සම්බන්ධයෙන් තවදුරටත් ගැටලු පවතින බව සඳහන්වේ.
- වින්දිතයින් හඳුනාගැනීම සහ රැකවරණ සේවා වෙත යොමු කිරීමේ සංඛ්‍යාව පහත වැටී තිබීම.
- නිලධාරීන් පිළිබඳ ගැටලු තවදුරටත් පැවතීම.
- ජනතාව ණය උගුල්වලට හසුවීමේ අවදානම වැඩිවීම.
- ජාවාරම්කරුවන්ට එරෙහිව ලැබුණු දඬුවම් අඩු වීම සහ නඩු විභාග ප්‍රමාද වීම.
විදෙස්ගත වන ශ්‍රී ලංකා ශ්‍රමිකයන්, විශේෂයෙන් මැදපෙරදිග සහ ආසියාතික රටවල ගෘහස්ථ, ඇඟලුම් සහ ඉදිකිරීම් ක්ෂේත්‍රවල නියැලෙන්නන් මෙන්ම මෑතකදී ආසියාතික රටවල ඔන්ලයින් වංචා ජාලයන්ට සහ යුක්‍රේන යුද්ධයට හසුවීමේ අවදානමට මුහුණපා ඇති පිරිස් සම්බන්ධයෙන් මෙම වාර්තාව මගින් පුළුල්ව අනාවරණය කර තිබේ.
