පාර්ලිමේන්තු මන්ත්‍රී වෛද්‍ය රාමනාදන් අර්ච්චුනා මහතාගේ මන්ත්‍රී ධුරය බලරහිත කිරීමේ නියෝගයක් නිකුත් කරන ලෙස ඉල්ලා ගොනු කර තිබෙන පෙත්සම වැඩිදුර විභාගය සඳහා දෙසැම්බර් මස 16 වනදා කැඳවන ලෙස අභියාචනාධිකරණය නියමකළේය.
සමාජ ක්‍රියාකාරිකයෙකු වන ඔෂල හේරත් මහතා විසින් මෙම පෙත්සම ඉදිරිපත් කර තිබුණි.
මෙම පෙත්සම අද (12) මායාදුන්නේ කොරයා සහ ලක්මාලි කරුණානායක යන මහත්ම මහත්මීන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී වග උත්තරකාර රාමනාදන් අර්චුනා මහතා වෙනුවෙන් පෙනී සිටි නීතිඥ සේනානි දයාරත්න මහතා අදාල නඩුවෙන් ඉවත් වී ඇති නිසා වෙනත් නීතිඥ වරයෙකු පත්කර ගැනීම සඳහා දිනයක් ලබාදෙන ලෙස ඉල්ලීමක් කර තිබුණි.
ඒ අවස්ථාවේදී විනිසුරු මඩුල්ල සදහන් කළේ මෙය 2024 වසරේ ගොනු කළ පෙත්සමක් බවය.
එම නිසා පෙත්සම් විභාගය සඳහා දීර්ඝ දිනයක් ලබාදිය නොහැකි බව පෙන්වා දුන් විනිසුරු මඩුල්ල වැඩිදුර පෙත්සම් විභාගය දෙසැම්බර් මස 16 වනදා පැවැත්වීමට දින නියම කරන බවත් සඳහන් කළේය.
පෙත්සම්කරු කියා සිටින්නේ වග උත්තර කාර රාමනාදන් අර්චුනා මහතා රජයේ වෛද්‍යවරයෙකු ලෙස කටයුතු කරමින් පාර්ලිමේන්තු මැතිවරණය සඳහා නාමයෝජනා පත්‍ර භාර දී ඇති බවය.
ඒ තුළින් ඔහු ආණ්ඩුක්‍රම ව්‍යවස්ථාව උල්ලංඝනය කර ඇතැයි පෙන්වා දෙන පෙත්සම්කරු ඒ අනුව ඔහු පාර්ලිමේන්තු මන්ත්‍රී වරයෙකු වශයෙන් තේරී පත්වීමට, ඡන්දය ප්‍රකාශ කිරීමට සහ අසුන් ගැනීම සඳහා සුදුසුකම් නොමැති බවට තීන්දුවක් ලබා දෙන ලෙසත් පෙත්සම තුළින් ඉල්ලා තිබේ.
