ඉන්දීය අග්‍රාමාත්‍ය නරේන්ද්‍ර මෝදි සහ අමෙරිකානු ජනාධිපති ඩොනල්ඩ් ට්‍රම්ප් අතර ඉකුත්දා පැවැති සෘජු දුරකථන සංවාදයෙන් අනතුරුව, ඉන්දියාවේ අමෙරිකානු තානාපති Sergio Gor ඒ පිළිබඳව ප්‍රතිචාරයක් දක්වා තිබේ.
තම X ගිණුමේ සටහනක් තබමින් ඔහු පෙන්වා දෙන්නේ, නායකයින් දෙපළ වෙළෙඳ කටයුතු, ආරක්ෂක ගිවිසුම්, බලශක්ති සැපයුම් සහ නැගී එන තාක්ෂණයන් ඇතුළු ද්විපාර්ශ්වික සහයෝගිතාවේ ප්‍රායෝගික ක්ෂේත්‍ර රැසක් පිළිබඳව මෙහිදී අවධානය යොමු කර ඇති බවය.
මීට අමතරව, කලාපීය වර්ධනයන් සහ ගෝලීය ස්ථාවරත්වය තහවුරු කිරීම සඳහා ගතයුතු පියවර පිළිබඳවද අදහස් හුවමාරු කරගත් බවද පවසයි.
මෙම සාකච්ඡාවෙන් පසු X සටහනක් තබමින් අග්‍රාමාත්‍ය මෝදි සඳහන් කර ඇත්තේ, මෙම අදහස් හුවමාරුව ඉතා ඵලදායී වූ බවය. පවත්නා විස්තීර්ණ ගෝලීය උපායමාර්ගික සබඳතා තවදුරටත් වර්ධනය කරගැනීම සඳහා දෙපාර්ශ්වයම අඛණ්ඩව සාකච්ඡා පවත්වන බව ඔහු වැඩිදුරටත් පවසා තිබේ.
මේ අතර ඉන්දීය මාධ්‍ය වාර්තා කරන්නේ එළඹෙන වසරේ මුල් භාගයේදී අමෙරිකානු ජනාධිපතිවරයාගේ ඉන්දීය සංචාරයක් පිළිබඳව ඉඟි පළවෙමින් ඇති බවත්ය.
