අගෝස්තු මාසයේ ඇති වූ දරුණු ගංවතුර තත්ත්වයෙන් තවමත් පීඩා විඳිමින් සිටින නේපාලයට, යළිත් වරක් ප්‍රබල නායයෑම් සහ ධාරානිපාත වර්ෂාවෙන් පීඩා විඳිමින් සිටියි.
මේවන විට පුද්ගලයින් 30කට ආසන්න පිරිසක් ජීවිතක්ෂයට පත්ව ඇති බව විදෙස් මාධ්‍ය පවසයි.
එරට ජාතික ආපදා කළමනාකරණ අධිකාරියට අනුව, පසුගිය සතිය අවසානයේ සිට පවුල් 1,900කට අධික සංඛ්‍යාවක් පීඩාවට පත්ව ඇති අතර, නිවාස 240කට වැඩි සංඛ්‍යයාවකට හානි වී ඇත.
මීට අමතරව මාර්ග, ගොඩනැඟිලි සහ පාලම් රැසක් ද ජලයට ගසාගෙන ගොස් තිබේ.
නේපාල ආර්ථිකයට දැඩි ලෙස බලපාන අන්නපූර්ණවල සංචාරක මාර්ගයේ සංචාරය කළ දේශීය හා විදේශීය සංචාරකයින් සිය සංචාර අතරමඟ නතර කර ආරක්ෂිත ස්ථාන වෙත යාමට පියවර ගෙන ඇත.
සාමාන්‍යයෙන් සති තුනක් පමණ ගතවන මෙම සංචාරක මාර්ගයේ මනාං සහ මුස්තාං දිස්ත්‍රික්කවල සිරවී සිටි බොහෝ සංචාරකයින් හෙලිකොප්ටර් මඟින් ඉවත් කර ගැනීමට බලධාරීන් කටයුතු කර තිබේ.
ස්ථාන කිහිපයක ප්‍රදේශවාසීන් තම නිවාස හා ඥාතීන් අහිමිවීමෙන් දැඩි ලෙස කම්පාවට පත්ව සිටිති.
තාවකාලික කූඩාරම්වල ජීවත් වන ජනතාව වැසි ජලය කාන්දු වීම හේතුවෙන් දැඩි අසීරුතාවකට මුහුණපා සිටින බව සඳහන් වේ.
මේ අතර, හිම්ලුං කඳුකරය ආසන්නයේ හටගත් හිම කඩාවැටීමකින් මළ සිරුරු 4ක් ගොඩගෙන ඇති අතර තවත් පුද්ගලයින් 12 දෙනෙක් අතුරුදන්ව සිටිති.
මනාංහි චමේ ගම්මානය අසල විශාල නායයෑමක් හේතුවෙන් ගඟක් අවහිර වී තාවකාලික ජලාශයක් නිර්මාණය වීම නිසා නිවාස සහ පාලම් කිහිපයක් යටවී ඇත.
