විදේශීය තාක්ෂණය මත යැපීම අවම කරමින් ස්වදේශීය දුම්රිය තාක්ෂණය වැඩිදියුණු කිරීමේ අරමුණින්, පැයට කිලෝමීටර් 350ක උපරිම වේගයකින් ගමන් කළ හැකි 'B35' මාදිලියේ නවතම අධිවේගී 'බුලට් ට්රේන්' දුම්රියක් නිෂ්පාදනය කිරීමට ඉන්දීය දුම්රිය සේවය පියවර ගනිමින් සිටී.
ඉන්දියාවේ මෙම දේශීය බුලට් ට්රේන් ව්යාපෘතිය 2030 වසර වනවිට අවසන් කිරීමටත්, ඊට අදාළ යටිතල පහසුකම් සංවර්ධනය කිරීමටත් සැලසුම් කර ඇත.
ඒ අනුව ව්යාපෘතියේ සමස්ත පිරිවැය ඉන්දීය රුපියල් ට්රිලියන 2ක් වන අතර, එය 2015 වසරේ මුලින් තක්සේරු කළ මුදල මෙන් දෙගුණයකට ආසන්න ප්රමාණයකි.
ඉන්දීය ජනමාධ්ය වාර්තා අනුව, ජපානය විසින් දැනට භාවිත කරන E5 කාණ්ඩයේ දුම්රිය නිෂ්පාදනය පියවරෙන් පියවර නතර කරන බව 2024 දෙසැම්බර් මාසයේදී ප්රකාශ කිරීමත් සමග ඉන්දියාව B35 දුම්රිය ව්යාපෘතිය ආරම්භ කර ඇත. ජපානයේ නවතම E10 දුම්රිය නිෂ්පාදනය 2030දී ආරම්භ කිරීමටත්, 2034 වනවිට ඒවා සේවයට එක් කිරීමටත් නියමිත අතර, එම E10 දුම්රියන් ද අනාගතයේදී භාවිත කිරීමට ඉන්දීය බලධාරීන්ගේ අවධානය යොමුව තිබේ.
ඊට අමතරව, ඉන්දියාව විසින් B28 නමැති තවත් අධිවේගී දුම්රියක් දේශීයව සංවර්ධනය කිරීම ආරම්භ කර ඇත. එසේම, චීනයේ CTCS පද්ධතියට සමාන ලෙස, දුම්රියවල වේගය පාලනය කිරීමට, ආරක්ෂිත පරතරය පවත්වා ගැනීමට සහ මගී ආරක්ෂාව තහවුරු කිරීමට උපකාරී වන 'භාරත් ට්රේන් කොන්ට්රෝල් සිස්ටම්' නමැති දේශීය සංඥා සහ පාලන පද්ධතියක් ද නිර්මාණය කරමින් පවතී.
