එක්සත් ජාතීන්ගේ මහා මණ්ඩල සැසිවාරයට සහභාගී වී සිටින ඉරාන නියෝජිත පිරිසට අමෙරිකා එක්සත් ජනපදය සමඟ කිසිදු සාකච්ඡාවක් පැවැත්වීමට කිසිදු සැලසුමක් නොමැති බව එරට රාජ්ය මාධ්ය සඳහන් කරයි.
අමෙරිකානු ජනාධිපති ඩොනල්ඩ් ට්රම්ප් ඉදිරියේදී වැඩිදුර සාකච්ඡා අපේක්ෂා කරන බව ප්රකාශ කිරීමෙන් අනතුරුව, ඉරානය මෙම ප්රතිචාරය දක්වා ඇත.
"නිව්යෝක් හි සිටින ඉරාන නියෝජිත පිරිසට අමෙරිකාව සමඟ සාකච්ඡා සඳහා කිසිදු සැලසුමක් නොමැත," යැයි ඉරානයේ නිල IRNA පුවත් සේවය පවසයි.
හොර්මුස් සමුද්ර සන්ධිය දින හතක් ඇතුළත යළි විවෘත කිරීමට ඉරාන රජය ඉදිරිපත් කළ යෝජනාව ප්රතික්ෂේප කර දිනකට පසු, ඉදිරියේදී සාකච්ඡා යළි ආරම්භ වනු ඇතැයි තමන් අපේක්ෂා කරන බව ට්රම්ප් ජනාධිපතිවරයා මාධ්ය වෙත පවසා තිබුණි.
"ඉරානයේ අදහස් සහ ස්ථාවරය කටාර් මැදිහත්කරුවෙකු හරහා අමෙරිකානු පාර්ශ්වයට පැහැදිලිව දන්වා තිබෙනවා," යැයි පෙන්වා දුන් IRNA පුවත් සේවය, ඉරාන නියෝජිත පිරිස අඟහරුවාදා ටෙහෙරාන් නුවර වෙත පිටත්ව යන බවද වැඩිදුරටත් සඳහන් කළේය.
යුද්ධය අවසන් කිරීම සහ ලෝක තෙල් හා ගෑස් ප්රවාහයෙන් ආසන්න වශයෙන් සියයට 20ක් පමණ ගමන් කළ උපායමාර්ගික ජල මාර්ගයක් වන හොර්මුස් සමුද්ර සන්ධිය විවෘත කිරීම සඳහා තමන් කොන්දේසි හතක් ඉදිරිපත් කර ඇති බව ඉරානය ප්රකාශ කරයි.
පෙබරවාරි මාසයේදී අමෙරිකානු-ඊශ්රායල ප්රහාර හේතුවෙන් ආරම්භ වූ ගැටුමේ කේන්ද්රස්ථානය බවට මෙම සමුද්ර සන්ධිය පත්ව තිබේ. එම ප්රහාරයෙන් පසු ටෙහෙරානය විසින් මෙම ජල මාර්ගය අවහිර කරන ලද අතර, ඊට ප්රතිචාර වශයෙන් වොෂින්ටන් බලධාරීන් ඉරාන වරායන් අවහිර කිරීමට පියවර ගත්තේය.
ලෙබනනයේ හිස්බුල්ලා සංවිධානයට එරෙහි ප්රහාර ඇතුළුව මැදපෙරදිග කලාපයේ දින හතක සටන් විරාමයක් ඉල්ලා සිටින ඉරානය, සිය විදේශ වත්කම් මුදා හැරීම, තෙල් අංශයට පනවා ඇති සම්බාධක ඉවත් කිරීම සහ අමෙරිකානු නාවික අවහිරය අවසන් කිරීම යන දැඩි කොන්දේසි ඉදිරිපත් කර ඇත. කෙසේ වෙතත්, ජනාධිපති ට්රම්ප් සෙනසුරාදා දින මෙම ඉල්ලීම් සම්පූර්ණයෙන්ම ප්රතික්ෂේප කළේය.
සැප්තැම්බර් 1 වන දිනෙන් පසු අමෙරිකාව විසින් ඉරානයට ප්රහාර එල්ල කර නොමැති බැවින් සටන්වල යම් මන්දගාමී තත්ත්වයක් දක්නට ලැබුණද, හොර්මුස් සමුද්ර සන්ධිය හරහා ගමන් කරන නෞකා වෙත එල්ල වන ප්රහාර අඛණ්ඩව සිදුවෙමින් පවතී.
