ප්‍රධාන පෙළේ ගුවන් සේවා ශ්‍රේණිගත කිරීම් ආයතනයක් වන Skytrax හි 2026 සමීක්ෂණ වාර්තාවට අනුව, ලොව හොඳම Economy Class ගුවන් සේවාව ලෙස සිංගප්පූරු ගුවන් සේවය තේරී පත්වී ඇත.

මෙම වර්ගීකරණයේ දෙවැනි සහ තෙවැනි ස්ථාන පිළිවෙළින් හොංකොං හි කැතේ පැසිෆික් සහ කටාර් එයාර්වේස් හිමිකරගෙන තිබේ.

ලොව පුරා ගුවන් මගීන්ගෙන් ලබාගත් ප්‍රතිචාර පදනම් කරගනිමින් සකස් කළ මෙම ශ්‍රේණිගත කිරීම්වල 4 වන ස්ථානය තායිවානයේ EVA Air හිමිකරගෙන ඇති අතර, 5 වන ස්ථානය ජපානයේ ANA (All Nippon Airways) ගුවන් සේවයට හිමිව ඇත.

Skytrax 2026 හොඳම ඉකොනොමි පන්තියේ ගුවන් සේවා 10 -

ඉදිරියෙන්ම සිටින ගුවන් සේවාවල විශේෂතා 

1. සිංගප්පූරු ගුවන් සේවය (Singapore Airlines) 
Boeing 777-300ER යානාවල බොහෝ ගුවන් සේවා පේළියකට ආසන 10  (3-4-3) බැගින් සවිකර ඇති අතර සිංගප්පූරු ගුවන් සේවය පේළියකට ආසන 9ක් පමණක් (3-3-3) යොදාගනී. මේ නිසා වැඩි ඉඩ පහසුකමක් හිමිවේ. පහසුවෙන් භාවිත කළ හැකි අමතර උපාංග, Foot bar, Dedicated cup holder සහ සකස් කළ හැකි හිස තබන කොට්ට අඩංගු වේ. උසස් සහ ගුණාත්මක ආහාර පාන සැපයීම සහ 'KrisWorld' විනෝදාස්වාද පද්ධතියෙන් සමන්විත වේ.

2. කැතේ පැසිෆික් (Cathay Pacific)
2026 වසරේ හොඳම කාර්ය මණ්ඩලයට හිමි සම්මානය දිනාගත්තේය. දීර්ඝ ගුවන් ගමන් පුරා වැසිකිළි පිරිසිදුව තබාගැනීම ඇතුළු විශිෂ්ට සහ උසස් පාරිභෝගික සේවාවක් සපයයි. නව යානාවල 4K තිර, Bluetooth Audio පහසුකම්, අලුත් තාක්ෂණික පහසුකම් සහ ආසන අසල උපාංග තැබීමට වැඩි ඉඩකඩක් ලබාදී ඇත. ඉකොනොමි ආසන සඳහා 4 වන ස්ථානයත්, ආහාර සඳහා 3 වන ස්ථානයත්, විනෝදාස්වාද පද්ධති සඳහා 3 වන ස්ථානයත් හිමි කරගෙන ඇත.

3. කටාර් එයාර්වේස් (Qatar Airways)
Boeing 777, Airbus A350 සහ Boeing 787 යානා සඳහා Starlink අධිවේගී Wi-Fi පහසුකම එක්කරමින් ගුවනේදී අන්තර්ජාලය භාවිත කිරීමේ පහසුව උපරිමයෙන් ලබාදී තිබේ. එමගින් ගුවනේදී Live Streaming, වීඩියෝ ඇමතුම් පහසුව ලැබේ. ආසන ශ්‍රේණිගත කිරීමේදී 6 වන ස්ථානය හිමි වුවද, අන්තර්ජාල පහසුකම් සහ සාමාන්‍ය ගුවන් සේවයේ ගුණාත්මකභාවය නිසා 3 වන ස්ථානය දිනාගත්තේය.

4. EVA Air (තායිවානය)
ශරීරයට පහසු වන ලෙස ආසන සැලසුම් කර ඇත. එමගින් දීර්ඝ ගමන්වලදී ශරීයට යෙදෙන පීඩනය අඩු වන නිසා පහසුව සැලසේ. ඉහළ ප්‍රමිතියෙන් යුතු තායිවාන සහ ආසියානු ආහාර වේල් සඳහා ප්‍රසිද්ධ අතර, ආහාර ප්‍රමිතියෙන් ලොව 2 වන ස්ථානය හිමි කරගෙන තිබේ.

5. ANA All Nippon Airways (ජපානය) 
මොවුන්ගේ ඇතැම් Boeing 787-9 යානාවල ආසන අතර පරතරය (Seat Pitch) අඟල් 34ක් දක්වා වේ. Footrests, Bluetooth Audio පහසුකම්, USB-C චාජර් සහ විශාල විනෝදාස්වාද තිර අඩංගු වේ.

ගුවන් සේවා විශේෂඥයින් පෙන්වා දෙන්නේ දීර්ඝ ගුවන් ගමන්වලදී ආසනවල අඟලක හෝ දෙකක අමතර ඉඩපහසුකම්, නිසි පාරිභෝගික සේවය සහ ගුණාත්මක ආහාර වේලක් ලබාදීම වැනි කුඩා වෙනස්කම් මගීන්ට සහනය සලසන බවය.