එක්සත් ජාතීන්ගේ මහා මණ්ඩල සැසිවාරය අමතමින් අමෙරිකානු ජනාධිපති ඩොනල්ඩ් ට්රම්ප් ඉරානය සම්බන්ධයෙන් දැඩි අනතුරු ඇඟවීමක් සිදුකර තිබේ.
ඉරානය සමඟ ගැටුම තවදුරටත් විසඳාගත නොහැකි වුවහොත්, ඉරානයට යළිත් ප්රහාර එල්ල කිරීම හෝ සාම ගිවිසුමකට එළැඹීම යන විකල්ප දෙක අතර තමන්ට “විශාල තීරණයක්” ගැනීමට සිදුවන බව ට්රම්ප් මෙහිදී ප්රකාශ කළේය.
ඔහු සඳහන් කළේ, “ඉරාන ඉස්ලාමීය ජනරජය විනාශ කර දමනවාද?” යන තීරණය පවා තමන් ඉදිරියේ පවතින බවය.
ට්රම්ප් සිය කතාවේදී කියා සිටියේ, ඉරානයට න්යෂ්ටික අවි ලබා ගැනීම වැළැක්වීම සඳහා ගැටුම වැදගත් වූ බවත්, තමන් විශ්වාස කරන “බලය හරහා සාමය” යන ප්රතිපත්තිය ක්රියාත්මක වන බවත්ය.
මේ අතර, එක්සත් ජාතීන්ගේ මහා මණ්ඩල සැසිවාරයට සමගාමීව අමෙරිකානු සහ ඉරාන නිලධාරීන් අතර පැය තුනකට ආසන්න සාකච්ඡාවක් පවත්වා තිබේ.
අමෙරිකානු විශේෂ නියෝජිත ස්ටීව් විට්කොෆ් සහ ඉරාන විදේශ අමාත්ය අබ්බාස් අරග්චි අතර එම සාකච්ඡාව පැවැත්වූ බව වාර්තා වේ. සාකච්ඡාව අවසන් කර පිටව යන අවස්ථාවේ විට්කොෆ් මාධ්යවේදීන්ට මහපටැඟිල්ල ඉහළට ඔසවා ප්රතිචාර දක්වා තිබේ.
ට්රම්ප් පසුව සඳහන් කළේ එම සාකච්ඡාව “ඉතා ඵලදායී” වූ බවය.
මේ අතර, රුසියාව සහ යුක්රේනය අතර පවතින යුද්ධය අවසන් කිරීම සඳහා තම රාජ්යතාන්ත්රික උත්සාහය සාර්ථක වනු ඇතැයිද ට්රම්ප් නැවතත් ප්රකාශ කළේය.
ඔහු සඳහන් කළේ රුසියානු සහ යුක්රේන නායකයන් සමඟ සමීපව කටයුතු කරමින් සිටින බවත්, යුද්ධය අවසන් කිරීමට හැකි වනු ඇති බවත්ය.
ට්රම්ප් සිය කතාවේදී එක්සත් ජාතීන්ගේ සංවිධානයද දැඩි ලෙස විවේචනය කළේය.
ඔහු සිය ස්ථාවරය අවධාරණය කරමින්, ජාතික ස්වෛරීභාවය සහ අමෙරිකාවේ මිලිටරි බලය පිළිබඳව අවධානය යොමු කරමින් මෙහිදී වැඩිදුරටත් කතා කළේය.
එමෙන්ම එක්සත් ජාතීන්ගේ මහලේකම් ඇන්ටෝනියෝ ගුටරෙස් සිය කතාවේදී ලෝකයේ භේදකාරී තත්ත්වයන් තවදුරටත් පුළුල් වෙමින් පවතින බවද අවධාරණය කළේය.
ට්රම්ප් මෙම කතාව පැවැත්වූයේ මැදපෙරදිග සහ යුක්රේනයේ පවතින යුද්ධ මධ්යයේ ඔහු ලෝක නායකයන් රැසක් සමඟ රාජ්යතාන්ත්රික සාකච්ඡා පවත්වමින් සිටින අවස්ථාවකය.
