දකුණු ඕස්ට්‍රේලියා ප්‍රාන්තයේ පිහිටි හුදකලා ගොවිපළක සිට අතුරුදන් වූ සිව් හැවිරිදි කුඩා පිරිමි දරුවා පිළිබඳව වසරකට ආසන්න කාලයක් ගතවී තිබුණද තවමත් කිසිදු තොරතුරක් අනාවරණය වී නොමැත.

2025 සැප්තැම්බර් 27 වනදා පස්වරුවේ ඇඩිලේඩ් නගරයේ සිට කිලෝමීටර් 300ක් පමණ දුරින් පිහිටි 'ඕක් පාර්ක්' නමැති තම පවුලේ බැටළු ගොවිපළේ එළිමහනේ සෙල්ලම් කරමින් සිටියදී මෙම කුඩා දරුවා අතුරුදන් වී තිබුණි.

ඔහු නිල් පැහැති ටී-ෂර්ටයක්, අළු පැහැති තොප්පියක් සහ බූට් සපත්තු යුගලක් පැළඳ සිට ඇති අතර, පස්වරු 5:00ට පමණ පස් ගොඩැල්ලක් අසල සෙල්ලම් කරනු ඔහුගේ මිත්තනිය විසින් දැක ඇත.

නමුත් පස්වරු 5:30ට පමණ ඔහුට නිවස තුළට එන ලෙස ඇමතීමට යන විට ඔහු එම ස්ථානයේ නොසිටි බවත් ඔහුව සොයා ගැනීමට නොහැකි වීම හේතුවෙන්  පොලීසියට පැමිණිලි කළ බවත් මිත්තණිය පවසා තිබේ.

සිද්ධිය සැලවීමත් සමඟ දකුණු ඕස්ට්‍රේලියානු පොලිසිය, ආරක්ෂක හමුදාව සහ හදිසි සේවා කණ්ඩායම් එක්ව දැවැන්ත මෙහෙයුමක් ආරම්භ කළ අතර, හෙලිකොප්ටර්, ඩ්‍රෝන යානා සහ කෘතිම බුද්ධිය සහිත කැමරා භාවිත කරමින් වර්ග කිලෝමීටර් සිය ගණනක ප්‍රදේශයක් පරීක්ෂාවට ලක් කෙරිණි.

එමෙන්ම ගොවිපළේ තිබූ ජල තටාක, වැව් සහ අවට තිබූ පතල් අගාධයන් පවා පරීක්ෂා කළද කුඩා දරුවා පිළිබඳ කිසිදු හෝඩුවාවක් සොයා ගැනීමට හැකියාව ලැබී නොමැත.

ප්‍රදේශයේ පැවැති හුදකලා බව නිසා බාහිර පුද්ගලයෙකු පැමිණ දරුවා පැහැරගැනීමේ හැකියාව ඉතා අඩු බවත්, දරුවා තනිවම ගොස් අතරමං වී ඇති බවට සාක්ෂි නොමැති බවත් නිගමනය කළ පොලිසිය, 2026 පෙබරවාරි මාසයේදී මෙම සිද්ධිය 'බරපතළ අපරාධයක්' ලෙස නම් කළේය.

විමර්ශනවලදී අනාවරණය වී ඇත්තේ දරුවා අතුරුදන් වූ අවස්ථාවේ ගොවිපළේ සිටි පවුලේ සාමාජිකයන් ලබා දුන් තොරතුරුවල පරස්පරතා පැවැති බවය.

දරුවාගේ දෙමාපියන් මෙම සැකයෙන් නිදහස් කර ඇති අතර, ගොවිපළේ පදිංචිව සිටි දරුවාගේ මිත්තනිය සහ සීයා පොලිසියට සහය දැක්වීම නතර කිරීම නිසා ඔවුන් කෙරෙහි පොලිසියේ සැකය යොමුව තිබේ.

දැවැන්ත මෙහෙයුම් සහ නවීන තාක්ෂණය භාවිත කළද කුඩා දරුවාට සිදු වූයේ කුමක් ද යන්න පිළිබඳ කිසිදු සාක්ෂියක් සොයා ගැනීමට නොහැකි වීම නිසා මෙය ඕස්ට්‍රේලියානු ඉතිහාසයේ වඩාත්ම අබිරහස් අතුරුදන් වීමක් ලෙස සඳහන් කර ඇත.

කෙසේවෙතත් දකුණු ඕස්ට්‍රේලියානු පොලිසිය කුඩා දරුවා සොයා තවදුරටත් විමර්ශන පවත්වයි.