බංග්ලාදේශයේ පැතිර යන දරුණු සරම්ප වසංගතය හේතුවෙන් ළමුන් 1,000කට අධික සංඛ්යාවක් ජීවිතක්ෂයට පත්ව තිබේ.
හදිසි එන්නත්කරණ ක්රියාවලියක් ක්රියාත්මක කළද, එරට තුළ තවදුරටත් රෝගීන් ඉහළ යමින් පවතී.
රට පුරා දැනටමත් දරුවන් මිලියන 19.8කට වැඩි පිරිසකට එන්නත් කර ඇති නමුත්, තවමත් දිනකට සැකකටයුතු නව රෝගීන් 1,000ක් පමණ වාර්තා වන බව වාර්තා වේ.
එන්නත් ලබාගෙන නොමැති දරුවන් වෙත ළඟා වීම සඳහා එළඹෙන සැප්තැම්බර් 26 වන දින රජය විසින් සිය ව්යාපාරයේ "තීව්ර අදියරක්" ආරම්භ කිරීමට නියමිත බව යුනිසෙෆ් ආයතනය පවසා තිබේ.
ලෝක සෞඛ්ය සංවිධානයට අනුව, මේ වසරේ මාර්තු මාසය වන තෙක් බංග්ලාදේශය සරම්ප තුරන් කිරීමේ මාවතේ "සැලකිය යුතු ප්රගතියක්" ලබා තිබුණි.
එහෙත්, වර්තමානයේ ලෝක සෞඛ්ය සංවිධානයේ දත්ත පෙන්වා දෙන්නේ මේ වසරේ මේ දක්වා ලෝකයේ අනෙකුත් ඕනෑම රටකට වඩා වැඩි සරම්ප රෝගීන් සංඛ්යාවක් බංග්ලාදේශයෙන් වාර්තා වී ඇති බවය.
මාර්තු මාසයේ සිට මේ දක්වා දැඩිලෙස බෝවන සුළු මෙම රෝගී තත්ත්වය හේතුවෙන් රෝගීන් 194,000කට අධික සංඛ්යාවක් වාර්තා වී ඇත.
අධික ජනගහනය සහ කොවිඩ් වසංගත සමයේ සාමාන්ය ප්රතිශක්තිකරණ වැඩසටහන් ප්රමාද වීම මෙම තත්ත්වය "දැඩි කුණාටුවක්" (Perfect storm) බවට පත් කළ බව යුනිසෙෆ් ආයතනය පවසයි.
හිටපු අගමැතිස් ෂීක් හසීනා බලයෙන් පහකිරීමෙන් පසු බලයට පත් අන්තර්වාර රජය, නව සැපයුම්කරුවන් සෙවීම හේතුවෙන් එන්නත් ඇණවුම් කිරීම ප්රමාද කිරීම අර්බුදය තවත් උග්ර වීමට හේතු වූ බව යුනිසෙෆ් චෝදනා කරයි.
කෙසේ වෙතත්, හිටපු සෞඛ්ය අමාත්යාංශ බලධාරීන් මෙම එන්නත් හිඟය ප්රතික්ෂේප කර ඇත.
වාර්තා වූ සරම්ප රෝගීන්ගෙන් 83%ක්ම එන්නත් ලබා නොගත් දරුවන් වන අතර, 10%ක් ළදරුවන් වේ.
බංග්ලාදේශයේ ළමා පෝෂණ ඌනතාව ඉහළ මට්ටමක පැවතීම නිසා, සරම්ප ආසාදනය වීමෙන් බරපතල සංකූලතා ඇති වීමට සහ මරණ සිදු වීමට ඇති අවදානම අධික බව සඳහන් වේ.
රෝගීන් පිරී යාම නිසා රෝහල්වල ධාරිතාව මෙන් දෙගුණයකටත් වඩා වැඩි පිරිසකට බිම පැදුරු මත ප්රතිකාර ලබා දීමට සිදුවී ඇති බව වාර්තා වේ.
කෙසේ වෙතත්, වසංගතය මේ වන විට බංග්ලාදේශයට පමණක් සීමා නොවී, එක්සත් රාජධානිය සහ අමෙරිකා එක්සත් ජනපදය වැනි රටවලද මෑත වසරවලදී සරම්ප රෝගීන් ඉහළ ගොස් ඇති බව සෞඛ්ය අංශ සඳහන් කරයි.
