කුඩා අවධියේදී වෙනස් පවුල් දෙකකට හදාවඩා ගැනීමට ලබාදුන් ඉන්දියානු සම්භවයක් සහිත කාන්තාවන් දෙදෙනෙකු, වසර 30කට පසු තමන් එකම මව්පියන්ගේ සැබෑ සහෝදරියන් බව සොයාගෙන තිබේ.
මෙසේ සිය සහෝදරත්වය හඳුනාගෙන ඇත්තේ දැනට 43 වන වියෙහි පසුවන මීනා ගෙල්ටින්ක් සහ 44 වන වියෙහි පසුවන මිනාල් ටිජ්සන් ය.
1980 දශකයේ මුල් භාගයේදී ඉන්දියාවේ මුම්බායි නගරයේ අනාථ නිවාස දෙකකින් නෙදර්ලන්ත යුවලවල් දෙකක් විසින් මොවුන්ව හදාවඩා ගැනීමට ගෙනගොස් ඇත.
මොවුන් ප්රථම වතාවට හමුවී ඇත්තේ යොවුන් වියේදීය.
එහිදී ඔවුන් දෙදෙනාගේ පෙනුමේ සහ හැසිරීම්වල තිබූ පුදුමාකාර සමානකම් නිසා එකිනෙකා කෙරෙහි විශේෂ ලෙන්ගතුකමක් ඇතිව තිබේ.
පසුව ලිපි හුවමාරු කරගනිමින් මිතුරියන් ලෙස සමීපව ඇසුරු කළද, එකල ඔවුන් අතර කිසිදු ලේ ඥාති සබඳතාවක් ඇති බවට තොරතුරක් නොතිබූ අතර පසුව වසර 15කට පමණ පෙර ඔවුන් අතර තිබූ සබඳතාව ගිලිහී ගියද, පසුගියදා සිදුකළ DNA පරීක්ෂණයකින් මොවුන් සියයට 100ක්ම එකම මව්පියන්ගේ දරුවන් බව තහවුරු විය.
ඒ අනුව නැවත එකතු වූ මෙම සහෝදරියන් දෙදෙනාගේ ඊළඟ බලාපොරොත්තුව වන්නේ තමන් උපත ලැබූ මුම්බායි නගරය වෙත එකට සංචාරය කිරීමය.
