අමෙරිකාව සහ ඉරානය අතර පවතින ගැටුම් නැවතත් උග්ර වී ඇති අතර, දෙපාර්ශ්වයම එකිනෙකාගේ තෙල් නැව් සහ යුද නැව් ඉලක්ක කරගනිමින් ප්රහාර එල්ල කර තිබේ.
එක්සත් ජනපද හමුදාව ප්රකාශ කරන්නේ ඉරානයට සම්බන්ධ තෙල් නැව් දෙකක් භාවිත කළ නොහැකි ලෙස විනාශ කළ බවත්, ඕමාන් ගල්ෆ් කලාපයේ තිබූ තවත් තෙල් නැවක් සම්පූර්ණයෙන්ම විනාශ කළ බවත්ය.
ඉන් එක් තෙල් නැවකට ප්රහාර එල්ල වී ඇත්තේ ඉරානයේ ප්රධාන තෙල් අපනයන මධ්යස්ථානය පිහිටි ඛාර්ග් දූපත ආසන්නයේදීය.
මෙම ප්රහාරයට පෙර ඉරානය විසින් අමෙරිකානු යුද නැව් දෙකක් ඉලක්ක කරමින් ප්රහාර එල්ල කර ඇති අතර එම ප්රහාර වළක්වා ගැනීමට තමන්ට හැකි වූ බවද ඇමරිකානු හමුදාව පවසයි.
ඊට ප්රතිචාර වශයෙන් ඉරාන රාජ්ය මාධ්ය සඳහන් කළේ, තමන් අමෙරිකාවට සම්බන්ධ නෞකා 3කට සහ හෝමුස් සමුද්ර සන්ධිය හරහා "අවසර නැති" මාර්ගවල ගමන් කළ තවත් තෙල් නැව් 3කට ප්රහාර එල්ල කළ බවය.
ප්රහාරයට ලක්වූ නැව්වල සිටි පිරිස් ආරක්ෂිතව ගොඩබිමට ගෙන ගොස් ඇති අතර, ජීවිත හානි සිදුවී නොමැති බවද වාර්තා වේ.
ලෝකයේ තෙල් සහ ගෑස් ප්රවාහනයෙන් 20%ක් පමණ සිදුවන හෝමුස් සමුද්ර සන්ධිය පවතින යුදමය තත්ත්වය නිසා වසා දමා ඇති අතර, මෙහි ප්රතිඵලයක් ලෙස ලෝක වෙළඳපොළේ තෙල් මිලද සීඝ්රයෙන් ඉහළ යමින් පවතී.
අමෙරිකානු ආරක්ෂක ලේකම්වරයා පවසන්නේ ඉරානය සිය නැව්වලට ප්රහාර එල්ල කරන්නේ නම් ඉරානයේ තෙල් නැව් විනාශ කරන බවය.
කෙසේ වෙතත්, අමෙරිකානු ජනාධිපති ඩොනල්ඩ් ට්රම්ප් පවතින මෙම ගැටුම්කාරී තත්ත්වය "සුළු කරුණක්" ලෙස හඳුන්වා තිබේ.
