ඉන්දීය රජයේ සහයෝගය ඇතිව කන්කසන්තුරේ වරාය සංවර්ධනය කිරීම සඳහා සැලසුම් කර ඇති ඉන්දු-ශ්රී ලංකා අවබෝධතා ගිවිසුම් කඩිනමින් අවසන් කිරීමට විශේෂ සාකච්ඡාවක් පවත්වා තිබේ.
බලශක්ති, වරාය සහ සිවිල් ගුවන්සේවා අමාත්ය අනුර කරුණාතිලක මහතාගේ මූලිකත්වයෙන් අද (03) පෙරවරුවේ අමාත්යාංශ පරිශ්රයේදී මෙම සාකච්ඡාව පැවැත්විණි.
ඉන්දීය රජය නියෝජනය කරමින් නියෝජ්ය ඉන්දීය මහකොමසාරිස් මෛත්රී කුල්කර්නි මහතා ඇතුළු නියෝජිත පිරිසක් ඊට සහභාගී වූහ.
නියෝජ්ය අමාත්ය ජනිත රුවන් කොඩිතුවක්කු මහතා, අමාත්යාංශ ලේකම් ඩබ්. ඩබ්. එස්. මංගල මහතා, වරාය අධිකාරියේ සභාපතිවරයා ඇතුළු නිලධාරීන් සහ විදේශ කටයුතු අමාත්යාංශයේ අදාළ නිලධාරීන්ද සාකච්ඡාවට එක්ව තිබේ.
මෙහිදී යෝජිත අවබෝධතා ගිවිසුම් සම්බන්ධයෙන් පවතින ගැටලු පිළිබඳව විශේෂ අවධානය යොමු වූ අතර, දෙපාර්ශවය විසින් ඒ සම්බන්ධයෙන් පුළුල් ලෙස සාකච්ඡා කර එකඟතාවන්ට පැමිණ ඇති බව සඳහන් වේ.
කන්කසන්තුරේ වරාය සංවර්ධන ව්යාපෘතිය ක්රියාත්මක කිරීම තුළින් ශ්රී ලංකාව සහ ඉන්දියාව අතර මගී ප්රවාහන සේවා මෙන්ම භාණ්ඩ ප්රවාහන කටයුතුද තවදුරටත් පුළුල් කිරීමට අවස්ථාව සැලසෙනු ඇතැයි අපේක්ෂා කෙරේ.
ව්යාපෘතිය ක්රියාත්මක කිරීම හා අධීක්ෂණය සඳහා ඒකාබද්ධ අධීක්ෂණ කමිටුවක් සහ තාක්ෂණික කමිටුවක් පිහිටුවීමටද යෝජනා වී තිබේ.
සාකච්ඡාවේ ප්රගතිය ඉතා ඉක්මනින් ඉන්දීය රජයට ඉදිරිපත් කර අවසන් තීරණයක් කඩිනමින් ලබාදීමට ඉන්දීය නියෝජිත පිරිස එකඟතාව පළ කර ඇත.
මෙම ව්යාපෘතිය මඟින් ඉන්දියාව සහ උතුරු ශ්රී ලංකාව අතර සමුද්රීය සම්බන්ධතා තවදුරටත් ශක්තිමත් කිරීම, උතුරු ප්රදේශයේ වරාය යටිතල පහසුකම් සංවර්ධනය කිරීම සහ කලාපීය ආර්ථික ක්රියාකාරකම් ඉහළ නැංවීම අපේක්ෂා කෙරේ.
එමෙන්ම, ව්යාපෘතියේ ප්රතිලාභ උතුරු ප්රදේශයේ ජනතාවටද හිමිවන බව අමාත්යාංශය සඳහන් කරයි.
2026 පෙබරවාරි මාසයේදී අමාත්ය අනුර කරුණාතිලක මහතා කන්කසන්තුරේ වරායේ වත්මන් තත්ත්වය නිරීක්ෂණය කිරීමෙන් අනතුරුව, ව්යාපෘතිය කඩිනමින් ආරම්භ කිරීමට අවශ්ය කටයුතු සම්පාදනය කරන ලෙස අමාත්යාංශ නිලධාරීන් සහ වරාය අධිකාරියේ කළමනාකාරීත්වයට උපදෙස් ලබාදී තිබිණි.
එහිදී ඉදිරි කෙටි කාලය තුළ අදාළ අවබෝධතා ගිවිසුම් අත්සන් කිරීමට කටයුතු කරන බවද අමාත්යවරයා ප්රකාශ කර තිබේ.
