තමන්ට අයත් තෙල් ප්රවාහන නෞකාවකට ඉරානය විසින් ප්රහාරයක් එල්ල කළ බවත් එම ප්රහාරය දැඩි හෙළා දැකින බවත් සෞදි අරාබිය පවසයි.
සෞදි ජාතික නාවික සමාගමක් වන Bahri සඳහන් කර ඇත්තේ එහි Sidr නෞකාව හෝමුස් සමුද්ර සන්ධිය හරහා ගමන් කරමින් සිටියදී සඳුදා රාත්රියේ මෙම ප්රහාරයට මුහුණදුන් බවය.
එම අවස්ථාවේදීම දකුණු කොරියානු සමාගමකට අයත් Senegal Prosperity නමැති තෙල් නෞකාවකටද Musandam ප්රදේශයට නැගෙනහිරින් ප්රහාරයක් එල්ල වූ බවට වාර්තා පළ වී තිබේ.
කෙසේ වෙතත්, සෞදි අරාබියේ මෙම චෝදනාව සම්බන්ධයෙන් ඉරානය මෙතෙක් නිල ප්රතිචාරයක් දක්වා නොමැත.
මීට පෙර ඉරානය ප්රකාශ කර තිබුණේ, නෞකා දෙකක් හෝමුස් සමුද්ර සන්ධිය හරහා අවසර නොලත් මාර්ගයකින් ගමන් කිරීමේදී මුහුදු බෝම්බවල ගැටීමෙන් ගිනිගත් බවය.
මෙම ප්රහාරය හේතුවෙන් පිලිපීන ජාතික නාවිකයින් දෙදෙනෙකුට දිවි අහිමිවීම පිළිබඳ එම නාවිකයින්ගේ පවුල්වල ඥාතීන් වෙත සෞදි රජය සිය ශෝකය පළ කර තිබේ.
මෙම ප්රහාරය වාර්තා වන්නේ, ඇමෙරිකානු හමුදාව ඉරානය සහ ඉරාන හමුදා ඉලක්ක කර ගනිමින් ගුවන් ප්රහාර මාලාවක් එල්ල කිරීමෙන් අනතුරුවය. ඊට ප්රතිචාර වශයෙන් ඉරානය අසල්වැසි අරාබි රටවල පිහිටි අමෙරිකානු හමුදා කඳවුරු වෙත මිසයිල සහ ඩ්රෝන ප්රහාර එල්ල කර තිබේ.
ඉරාන සෞඛ්ය අමාත්යවරයාට අනුව, අමෙරිකානු ප්රහාරවලින් පුද්ගලයන් 18 දෙනෙකු මියගොස් 108 දෙනෙකු තුවාල ලබා ඇත.
දකුණු ඉරානයේ Sirik නගරයේ විවාහ උත්සවයක් පැවැත්වෙමින් තිබූ ස්ථානයකට එල්ල වූ ප්රහාරයකින් ළමුන් දෙදෙනෙකු ඇතුළු සිව්දෙනෙකු මියගිය බවටද ඉරානය චෝදනා කර ඇත. එම වාර්තා සම්බන්ධයෙන් පරීක්ෂණයක් සිදුකරන බව අමෙරිකානු හමුදාව ප්රකාශ කර තිබේ.
