අලි-මිනිස් ගැටුම පාලනය කිරීම සඳහා අදාළ සියලු පාර්ශ්ව හා ආයතන ඒකාබද්ධ කර ගනිමින් ජාතික ප්රතිපත්තියක් කඩිනමින් සකස් කිරීමේ අවශ්යතාව පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාවේදී අවධාරණය කර තිබේ.
පාර්ලිමේන්තු මන්ත්රී හෙක්ටර් අප්පුහාමි මහතාගේ සභාපතිත්වයෙන් පාර්ලිමේන්තුවේදී පසුගියදා රැස් වූ එම කාරක සභාවේදී, Coalition for Inclusive Impact (CII), UNESCO සහ දරිද්රතා විශ්ලේෂණ කේන්ද්රය (CEPA) එක්ව ක්රියාත්මක කළ ව්යාපෘතියක පර්යේෂණ ප්රතිඵල සහ ප්රතිපත්ති නිර්දේශ පිළිබඳව සාකච්ඡා කෙරිණි.
එහිදී අලි-මිනිස් ගැටුම කළමනාකරණය කිරීම, වන අලින්ගේ ආහාර හා ජල අවශ්යතා සපුරාලීම, වනජීවී වාසස්ථාන වැඩිදියුණු කිරීම සහ පරිසර සංරක්ෂණයට ප්රජා සහභාගීත්වය ඉහළ නැංවීම පිළිබඳව අවධානය යොමු විය.
වනඅලි වාසස්ථානවල ජල මූලාශ්ර හා ආහාර සම්පත් සම්බන්ධයෙන් පවතින ගැටලු හේතුවෙන් වන අලි ජනාවාස වෙත පැමිණීමේ අවදානම අවම කිරීමට සුදුසු කළමනාකරණ වැඩපිළිවෙළක් අවශ්ය බවද කාරක සභාව පෙන්වා දී තිබේ.
හඳුනාගෙන ඇති අලි මංකඩ අතරින් ප්රමුඛතා පදනම මත අලි මංකඩ 06ක් කඩිනමින් ප්රකාශයට පත් කිරීම, වනජීවී රක්ෂිතවල වාසස්ථාන වැඩිදියුණු කිරීම සහ ප්රදේශවාසීන් දැනුවත් කිරීමේ වැඩසටහන් ශක්තිමත් කිරීම සම්බන්ධයෙන්ද අවධානය යොමු විය.
මේ අතර, මුතුරාජවෙල තෙත් බිම් පද්ධතිය ආරක්ෂා කිරීම සඳහා රජයට අයත් ඉඩම් නිසි පරිදි මැනුම් කර සීමා ලකුණු යෙදීම සහ අනවසර ක්රියාකාරකම් වැළැක්වීම සඳහා අදාළ ආයතන අතර සම්බන්ධීකරණය ශක්තිමත් කිරීමේ අවශ්යතාවද සාකච්ඡා කෙරිණි.
සුළු පන්න ධීවර ප්රජාව මුහුණ දෙන ගැටලු සහ ඔවුන්ගේ ජීවනෝපාය ශක්තිමත් කිරීම සඳහා ගත හැකි ක්රියාමාර්ග පිළිබඳවද මෙහිදී අවධානය යොමු විය.
අලි-මිනිස් ගැටුම ඇතුළු පාරිසරික ගැටලු විසඳීම සඳහා විද්යාත්මක පර්යේෂණ හා දත්ත මත පදනම් වූ ක්රියාමාර්ග ගැනීමත්, අදාළ රාජ්ය ආයතන අතර සම්බන්ධීකරණය ශක්තිමත් කිරීමත්, ශ්රී ලංකාවට ගැළපෙන සාර්ථක ක්රමවේද අධ්යයනය කිරීමත් අවශ්ය බව කාරක සභාවේදී අවධාරණය කෙරිණි.
