ගෝලීය උණුසුම ඉහළ යාම සහ සාගර උෂ්ණත්වය අධික ලෙස ඉහළ යාම හේතුවෙන් ලෝකයේ කොරල් පර විනාශ වීමේ ප්රවණතාව පෙර නොවූ විරූ ලෙස ඉහළ ගොස් තිබේ.
මෙම තත්ත්වය තව දුරටත් ඉහළ යමින් පවතින්නේ, ස්වභාවිකව යථා තත්ත්වයට පත්වීමට කොරල් පරවලට ප්රමාණවත් කාලයක් නොලැබීම හේතුවෙන් බව විද්යාඥයෝ පෙන්වා දෙති.
රටවල් 120ක් ආවරණය වන පරිදි වසර 40කට වැඩි දත්ත විශ්ලේෂණය කරමින් 'ගෝලීය කොරල් පර නිරීක්ෂණ ජාලය' (Global Coral Reef Monitoring Network) විසින් නිකුත් කරන ලද නවතම වාර්තාවක මෙම තොරතුරු අනාවරණය කර ඇත.
මීට පෙර දශක කිහිපයකට වරක් වාර්තා වූ මෙම කොරල් ඛාදනය වීමේ සංසිද්ධිය, මේ වන විට සාමාන්යයෙන් සෑම වසර 5කට හෝ 6කට වරක් වාර්තා වන මට්ටමට පත්ව ඇති බව ඔවුන් පෙන්වා දී තිබේ.
සමස්ත සාගර ජීවීන්ගෙන් හතරෙන් එකක් රඳා පවතින්නේ කොරල් පර මත වන අතර, 2023 වසරේදී වාර්තා වූ ඉතිහාසයේ පුළුල්ම කොරල් ඛාදනය වීමේ සංසිද්ධිය හේතුවෙන් ලෝකයේ කොරල් ප්රදේශවලින් 77% කට ආසන්න ප්රමාණයකට දැඩි බලපෑම් එල්ල වී ඇත.
කොරල් පර විනාශ වීමෙන් සාගර පරිසර පද්ධතියට පමණක් නොව, වෙරළ තීරයන් ආරක්ෂා වීමට සහ මිලියන සංඛ්යාත ජනතාවකගේ ධීවර මෙන්ම ආහාර ජීවනෝපායන්ටද බරපතළ තර්ජන එල්ල වී තිබේ.
හරිතාගාර වායු විමෝචන කප්පාදුවක් සිදු කිරීම සහ තිරසාර නොවන මසුන් ඇල්ලීම මෙන්ම අධික වෙරළබඩ සංවර්ධනය වැනි තර්ජන නිසි ලෙස කළමනාකරණය කිරීම මඟින් මෙම විනාශයන් වළකා ගත හැකි බව විද්යාඥයෝ අවධාරණය කරති.
