නේපාලයේ සිදුවූ විනාශකාරී ගංවතුර සහ නායයෑම්වලින් අනතුරුව සුන්බුන් අතර සිර වී සිට දිවි බේරා ගත් 97 හැවිරිදි වයෝවෘද කාන්තාවක් ගැන දැඩි කතාබහට ලක්ව තිබේ.
ඇය නමින් ගුණා මායා බෝහාරා 'Guna Maya Bohara' බව හඳුනාගෙන ඇති බව විදෙස් මාධ්ය පවසයි.
ගංවතුර උවදුරින් ඇය නවාතැන් ගෙන සිටි වැඩිහිටි නිවාසය කඩා වැටීම හේතුවෙන් ඇය සුන්බුන් යට සිරවී සිට තිබේ.
පොලිසිය සහ නේපාල හමුදාව එක්ව පැය හතරක දැඩි පරිශ්රමයක් යොදා ඇය බේරාගෙන ඇති අතර, ඇයව එක්ස්කැවේටර් යන්ත්රයක ඉදිරිපස කොටසේ තබා ආරක්ෂිත ස්ථානයකට රැගෙන යන අයුරු දැක්වෙන වීඩියෝවක් මේ වන විට අන්තර්ජාලය තුළ දැඩි ලෙස සංසරණය වෙමින් පවති.
ඇයව බේරාගැනීමට එම ස්ථානයට ගිය ඇයගේ මුණුබුරෙකු වන දීපක් බෝහාරා පවසා ඇත්තේ, මඩින් වැසුණු ඇඳුම්වලින් හා විඩාවට පත් මුහුණින් යුතුව සිටි ඇය යුද්ධයකින් ජයග්රහණය කර පැමිණි "වීරයෙකු" මෙන් පෙනුණු බවය.
මෙවැනි ව්යවසනකාරී අනතුරකින් පසුවත් දිවි බේරාගෙන පැමිණෙමින් සිටි ඇයගේ මෙම ඡායාරූප සහ වීඩියෝ දර්ශන නේපාලයේ මහා ව්යසනයේ මානුෂීය මුහුණුවර මෙන්ම බලාපොරොත්තුවේ සංකේතය බවට පත්ව ඇති බව වාර්තා වේ.
ඇය මේ වන විට රෝහලේ ප්රතිකාර ලබමින් සිටින බව සඳහන්වේ.
පසුගිය දා හිමාලයේ ග්ලැසියරයක් කඩාවැටීම හේතුවෙන් නේපාලයේ රසුවා දිස්ත්රික්කයේ භෝත කෝෂි නදියේ හදිසි ගංවතුර තත්ත්වයක් හටගත්තේය.
මේ වන විට මළ සිරුරු 800කට ආසන්න ප්රමාණයක් සොයාගෙන ඇති අතර, ඉන්දීය ජාතිකයින් 300කට අධික සංඛ්යාවක් ඇතුළුව පුද්ගලයින් 3,000කට ආසන්න පිරිසක් තවදුරටත් අතුරුදන්ව සිටිති.
පවතින අයහපත් කාලගුණයත් සමඟ ඉදිරියේදී තවදුරටත් වර්ෂාපතනය සහ ගිගුරුම් සහිත වැසි ඇති විය හැකි බව කාලගුණ විද්යා දෙපාර්තමේන්තුව අනතුරු ඇඟවීම නිසා මුදවාගැනීමේ මෙහෙයුම්වලට බාධා එල්ල වී ඇති බව සඳහන් වේ.
මෙම දැවැන්ත විනාශයෙන් රට යථා තත්ත්වයට පත් කිරීම සඳහා අමෙරිකානු ඩොලර් බිලියන 4ත් 5ත් අතර මුදලක් අවශ්ය වනු ඇතැයි නේපාල මුදල් ඇමති ස්වර්නිම් වාග්ලේ ඇස්තමේන්තු කර තිබේ.
