උතුරු ස්විට්සර්ලන්තයේ තුරඟ තරඟ පිටියක පැවැති සංගීත ප්රසංගයක් අතරතුර සිදුවූ වෙඩිතැබීමකින් 22 හැවිරිදි තරුණියක් ජීවිතක්ෂයට පත්ව තවත් පස්දෙනෙකු තුවාල ලබා තිබේ.
සූරිච් අගනුවර සිට කිලෝමීටර් 46ක් පමණ දුරින් පිහිටි ආරාවු හි එරට වේලාවෙන් අද (30) අලුයම පැවති මෙම සංගීත ප්රසංගයට එල්ල වූ මෙම වෙඩි ප්රහාරයෙන් තුවාල ලැබූ තරුණිය එම ස්ථානයේම මියගොස් ඇත.
එමෙන්ම තුවාල ලැබූ පිරිස වයස අවුරුදු 24ත් 27ත් අතර පසුවන්නන් වන අතර, ඒ අතර තවත් තරුණියක් ද සිටින බව එරට පොලීසිය තහවුරු පැවසීය. ඔවුන් අතර සුළු තුවාල ලැබූවන් මෙන්ම බරපතළ තත්වයේ පසුවන්නන් ද වන බව සඳහන්ය.
රසිකයන් 3,500ක පමණ පිරිසක් සහභාගී වීමට නියමිතව තිබූ මෙම ප්රසංගයට එල්ල වූ ප්රහාරයට නිශ්චිත හේතුව, අපරාධකරුගේ අනන්යතාවය හෝ ඊට පසුබිම් වූ චේතනාවන් මෙතෙක් අනාවරණය වී නොමැත.
ආසන්න වශයෙන් 23,000ක පමණ ජනගහනයක් වෙසෙන ආරාවු ප්රදේශයේ සිදුවූ මෙම පුවතත් සමග ප්රදේශවාසීන් දැඩි කම්පනයට පත්ව ඇත.
යුරෝපයේ බලපත්ර සහිත ගිනිඅවි හිමි පුද්ගලයන් වැඩිම පිරිසක් සිටින රටක් ලෙස ස්විට්සර්ලන්තය සැලකෙන මුත්, ලොව අවම වෙඩිතැබීමේ සිදුවීම් වාර්තා වන සුරක්ෂිත රටක් ලෙසද එරට ප්රකටය.
