අමෙරිකානු ජනාධිපති ඩොනල්ඩ් ට්රම්ප් කැනඩාව සමඟ පවතින මතභේද තවදුරටත් උග්ර කරමින්, උතුරු අමෙරිකාවේ මහා විල් පහෙන් එකක් වන ලේක් ඔන්ටාරියෝ (Lake Ontario) හි නම ‘ලේක් ඇමරිකා (Lake America)’ ලෙස වෙනස් කිරීමට නියෝග කර තිබේ.
ට්රම්ප්ගේ විධායක නියෝගය අදාළ වන්නේ එම විල සම්බන්ධයෙන් අමෙරිකානු ෆෙඩරල් ආයතන භාවිත කරන නාමයට පමණක් වන අතර, කැනඩාව, ජාත්යන්තර ආයතන හෝ වෙනත් සංවිධාන විසින් එය හඳුන්වන නාමයට එම නියෝගය බලපාන්නේ නැත.
අමෙරිකානු ජනාධිපතිවරයා ඕවල් කාර්යාලයේදී මාධ්ය වෙත ප්රකාශ කර ඇත්තේ ලේක් ඔන්ටාරියෝහි නම වහාම ක්රියාත්මක වන පරිදි ‘ලේක් ඇමරිකා’ ලෙස වෙනස් කරන බවයි.
කෙසේ වෙතත්, කැනේඩියානු අග්රාමාත්ය මාර්ක් කානි සහ නිව්යෝර්ක් ප්රාන්ත ආණ්ඩුකාර කැති හොකල් එම නම භාවිත නොකරන බව ප්රකාශ කර තිබේ.
වසර 400කට වැඩි ඉතිහාසයක් සහිත ලේක් ඔන්ටාරියෝහි ජල පෘෂ්ඨයෙන් සියයට 52ක් පමණ කැනඩාවට අයත් වන අතර, ඉතිරි කොටස අමෙරිකාවේ නිව්යෝර්ක් ප්රාන්තයට අයත් වේ.
“කැනඩාව සහ අමෙරිකාව යන රටවල් ලෙස පැවතීමටත් පෙර සිටම මෙම විලට එම නම තිබූ බව” කැනේඩියානු අග්රාමාත්යවරයා සඳහන් කර තිබේ.
මේ අතර, නිව්යෝර්ක් ආණ්ඩුකාර කැති හොකල් සමාජ මාධ්ය ඔස්සේ ප්රකාශ කර ඇත්තේ “නිව්යෝර්ක් එය එම නමින් හඳුන්වන්නේ නැහැ” යනුවෙනි.
වර්මොන්ට් ප්රාන්ත ආණ්ඩුකාර ෆිල් ස්කොට් ද ට්රම්ප්ගේ තීරණය “සුළු හා බලාපොරොත්තු සුන් කරවන ක්රියාවක්” ලෙස විවේචනය කර තිබේ.
ලේක් ඔන්ටාරියෝ යන නාමය ආදි වෙන්ඩාට් ජනතාවගේ භාෂාවෙන් ආරම්භ වූවක් බව සඳහන් කරන වෙන්ඩාට් ජාතියේ ප්රධානී පියර් පිකාර්ඩ්ද මෙම නම වෙනස් කිරීමට විරෝධය පළ කර ඇත.
