හදිසි ජල ගැලීම් හේතුවෙන් අතිශ්ය ව්යසනකාරී තත්ත්වයකට මුහුණ දුන් නේපාලය වෙනුවෙන් සහාය ලබාදීමට සූදානම් බව ඉන්දියාව පවසයි.
ඉන්දීය අග්රාමාත්ය නරේන්ද්ර මෝදි පවසා ඇත්තේ, නේපාලයට බලපා ඇති මෙම දුෂ්කර අවස්ථාවේදී ඉන්දියානු ජනතාව නේපාලය සමඟ පූර්ණ සහෝදරත්වයෙන් සහ සහයෝගයෙන් කටයුතු කරන බවය.
අමෙරිකානු භූ විද්යා සමීක්ෂණ ආයතනය සිදුකළ වැඩිදුර විශ්ලේෂණවලින් හෙළිවී ඇත්තේ ග්ලැසියරය කඩා වැටීමෙන් සිදුවූ නායයෑමක් හේතුවෙන් චීනයේ සිට ගලාබසින බෝත්කොෂි ගංගාවේ ජල මට්ටම එකවර ඉහළයාමෙන් මෙම හදිසි ජල ගැලීම සිදුවූ බවය.
නේපාල-ටිබෙට් දේශසීමාවේ ඇතිවූ විනාශකාරී ජලගැලීමෙන් නේපාලයේ සිදුවූ මරණ සංඛ්යාව මේ වනවිට 270 දක්වා ඉහළගොස් තිබේ.
එරට වේලාවෙන් ඊයේ (26) උදෑසන ඇති වූ මෙම ගංවතුර තත්ත්වයෙන් මේ වනවිට පුද්ගලයින් 800කට වැඩි පිරිසක් තවමත් අතුරුදහන් වී ඇත.
අග්රාමාත්ය මෝදි සඳහන් කරන්නේ තමා නේපාල අග්රාමාත්ය බාලේන්ද්ර ෂා සමඟ දුරකථනයෙන් අදහස් හුවමාරු කරගත් බවත්, අසල්වැසි නේපාලයට අවශ්ය සියලුම මානුෂීය ආධාර සහ සහන සැපයීමට නවදිල්ලිය සූදානම් බවට සහතික වූ බවත්ය.
එමෙන්ම, මෙම හදිසි ගංවතුර තත්ත්වය හේතුවෙන් ඉන්දියාව, අමෙරිකා එක්සත් ජනපදය, එක්සත් රාජධානිය සහ මැලේසියාව ඇතුළු රටවල් රැසක සංචාරකයින් ඇතුළුව මුළු සංචාරකයින් 500කට වැඩි පිරිසක් අතුරුදහන් වී ඇති බව නිලධාරීහු වැඩිදුරටත් තහවුරු කරයි.
