චීනයේ යෞවනයින් අධ්‍යාපනික පීඩනය, මානසික ආතතිය සහ පවුලේ ගැටලුවලින් මිදීම සඳහා වෛද්‍ය නිර්දේශයකින් තොරව ඖෂධ අධික මාත්‍රාවෙන් භාවිත කරන බවට අනාවරණ වී තිබේ.

චීනයේ වෙරළබඩ ප්‍රදේශයක ජීවත් වූ 14 හැවිරිදි ෂියාඕමේයි ද එවැනි අත්දැකීමකට මුහුණ දුන් දැරියකි.

විභාග පීඩනයෙන් මිදීමට වැඩිහිටි තරුණයෙකුගේ උපදෙස් මත ඇය මුලින්ම කැස්ස සඳහා භාවිත කරන ඖෂධයක් අධික ලෙස ලබාගෙන ඇති අතර, පසුව එම අත්දැකීම හේතුවෙන් වෙනත් ඖෂධ වෙතද යොමුවී තිබේ.

ඇය පවසන්නේ විභාගවලදී අසාර්ථක වූ විට, අධ්‍යාපනික පීඩනය වැඩි වූ විට හෝ දෙමාපියන් සමඟ ගැටුම් ඇති වූ විට ඖෂධ භාවිත කළ බවය.

වසර දෙකක පමණ කාලයක් ඇය විවිධ වෛද්‍ය නිර්දේශිත ඖෂධ අධික මාත්‍රාවෙන් ලබාගෙන ඇති අතර, ඒවා කිසිවක් ඇයට හෝ ඇගේ පවුලේ සාමාජිකයෙකුට වෛද්‍යවරයෙකු විසින් නියම කර තිබූ ඒවා නොවන බව සඳහන් වේ.

සමාජ මාධ්‍ය හරහා ඖෂධ භාවිතයේ පැතිරීම...

චීන යෞවනයින් අතර මෙවැනි ඖෂධ භාවිතය පිළිබඳ සාකච්ඡා පැවැත්වෙන බව BBC පුවත් සේවය විසින් විවිධ සමාජ මාධ්‍ය වේදිකාවල අන්තර්ජාල කණ්ඩායම් පරීක්ෂා කිරීමේදී අනාවරණය වී තිබේ.

ඇතැමුන් ඖෂධවල බලපෑම් පිළිබඳ අත්දැකීම් බෙදාගන්නා අතර, තවත් පිරිසක් විවිධ ඖෂධ ලබාගැනීමේ ක්‍රම පිළිබඳ තොරතුරු හුවමාරු කරගෙන ඇත.

විශේෂඥයන් පවසන්නේ මෙය හුදෙක් නීතිවිරෝධී ඖෂධ භාවිතය පිළිබඳ ගැටලුවක් නොව, යොවුන් පරපුර අතර පවතින මානසික සෞඛ්‍ය අර්බුදයක ලක්ෂණයක් ලෙසද සැලකිය යුතු බවය.

විභාග පීඩනය ප්‍රධාන හේතුවක්...

ෂියාඕමේයි ඉගෙනුම ලැබූ පන්තියේ සිසුන් අතරද ඖෂධ අධික ලෙස භාවිත කර තමන්ට ඇති පීඩනයෙන් මිදීම පිළිබඳ සාකච්ඡා පැවති බව ඇය පවසයි.

එම පාසලේ ඉහළ දක්ෂතා දක්වන පන්තිවල සිසුන් සංඛ්‍යාව අඩු කිරීම සඳහා දැඩි තරගකාරී ක්‍රමයක් ක්‍රියාත්මක වූ බවද සඳහන් වේ. ලකුණු පහළ ගියහොත් එම පන්තියෙන් ඉවත් වීමට සිදුවීම නිසා සිසුන් දැඩි මානසික පීඩනයකට පත්ව තිබේ.

චීන සමාජ විද්‍යාඥ ෂියැං බියාඕ පෙන්වා දෙන්නේ බොහෝ පවුල්වල එකම දරුවා වෙත අනාගත බලාපොරොත්තු විශාල ප්‍රමාණයක් පැවරීමද මෙම තත්ත්වයට බලපාන බවයි.

ඖෂධ පාලනය දැඩි කළත් නව විකල්ප සොයා යෑම...

චීන බලධාරීන් මීට වසර කිහිපයකට පෙර තරුණයන් අතර අනිසි ලෙස භාවිත වූ කැස්ස සඳහා භාවිත කරන ඖෂධයක් මනෝ ක්‍රියාකාරී ඖෂධයක් ලෙස වර්ගීකරණය කර එහි අලෙවිය පාලනය කිරීමට පියවර ගෙන තිබේ.

එහෙත් එක් ඖෂධයක් පාලනය කිරීමෙන් පසු තරුණයන් වෙනත් ඖෂධ වෙත මාරුවීම ගැටලුව තවදුරටත් සංකීර්ණ කර ඇති බව වාර්තා වේ.

චීන රජයේ මත්ද්‍රව්‍ය පාලන ආයතනයද මෑතකදී වෛද්‍ය නිර්දේශිත ඖෂධ අනිසි ලෙස භාවිත කිරීම, විශේෂයෙන්ම බාලවයස්කරුවන් අතර, වර්ධනය වන ගැටලුවක් බවට අනතුරු අඟවා තිබේ.

මානසික සෞඛ්‍ය සේවා පිළිබඳ අවධානය…

2023 වසරේ චීනයේ මානසික සෞඛ්‍ය පිළිබඳ වාර්තාවකට අනුව, මිලියන 95කට ආසන්න පිරිසක් මානසික අවපීඩනයෙන් පීඩාවිඳින බවට ඇස්තමේන්තු කර ඇති අතර, එයින් සැලකිය යුතු ප්‍රතිශතයක් වයස අවුරුදු 18ට අඩු පිරිසක් බව සඳහන් වේ.

චීන රජය 2030 වන විට පාසල් මට්ටමින් උපදේශන සේවා, රෝහල් මට්ටමින් මානසික සෞඛ්‍ය සේවා සහ අර්බුදකාරී අවස්ථාවල සහාය ලබාදීමේ පුළුල් පද්ධතියක් ගොඩනැගීමට සැලසුම් කර තිබේ.

කෙසේ වෙතත්, ළමා හා යොවුන් මානසික සෞඛ්‍ය පිළිබඳ විශේෂඥ වෛද්‍යවරුන්ගේ හිඟය තවමත් ප්‍රධාන අභියෝගයක් බව විශේෂඥයෝ පෙන්වා දෙති.

දෙමාපියන්ගේ සහයෝගය ජීවිතය වෙනස් කළ ෂියාඕමේයි...

අවසානයේදී අධික ඖෂධ මාත්‍රාවක් ලබාගැනීමෙන් දැඩි ලෙස රෝගාතුර වූ ෂියාඕමේයි රෝහල්ගත කිරීමට සිදුව තිබේ.

එම සිදුවීමෙන් පසු ඇගේ දෙමාපියන් ඇයට දොස් පැවරීම වෙනුවට ඇගේ හැඟීම් පිළිබඳව ඇහුම්කන් දීමට පටන්ගෙන තිබේ.

එම පවුල් සහයෝගය ඇගේ මානසික තත්ත්වය යහපත් කර ගැනීමට මෙන්ම ඇය බියෙන් සිටි වැදගත් ප්‍රවේශ විභාගයට සාර්ථකව මුහුණදීමටද උපකාර වූ බව ඇය පවසයි.

විශේෂඥයන් පෙන්වා දෙන්නේ ඖෂධ අනිසි භාවිතය පාලනය කිරීම පමණක් ප්‍රමාණවත් නොවන අතර, යොවුන් පරපුරේ මානසික ආතතිය, විභාග පීඩනය, පවුල් සබඳතා සහ මානසික සෞඛ්‍යය පිළිබඳ විවෘත සංවාදයක් ඇති කිරීම ද අත්‍යවශ්‍ය බවයි.