
විදේශීය සේවකයින් සඳහා වන නව H-1B වීසා ගාස්තුව අමරිකානු ඩොලර් 100,000 ඉක්මවා ඉහළ නැංවීම සඳහා ජනාධිපති ඩොනල්ඩ් ට්රම්ප්ගේ පරිපාලනය විසින් නව නීති යෝජනාවක් අද (24) එළිදක්වන ලදී.
ජනපති ට්රම්ප් විසින් මීට පෙර පසුගිය වසරේ පනවනු ලැබූ මෙම ගාස්තුව අධිකරණය විසින් අවහිර කර තිබුණි.
තාක්ෂණික, අධ්යාපනික සහ පර්යේෂණ අංශ දැඩි ලෙස යැපෙන මෙම වීසා බලපත්රවල පිරිවැය මෙමඟින් අතිමහත් ලෙස ඉහළ යනු ඇත.
මීට පෙර ෆෙඩරල් විනිසුරුවරයෙකු විසින් මෙම ගාස්තුව නීති විරෝධී බවට තීන්දු කරමින් එය එකතු කිරීමෙන් ට්රම්ප් පරිපාලනය වළක්වන ලදී.
පසුගිය වසරේ නිකුත් කරන ලද ජනපති ට්රම්ප්ගේ නියෝගය, නිකුත් කර වසරක් පිරෙන සැප්තැම්බර් මාසයේදී කල් ඉකුත් වීමට නියමිතය.
කෙසේ වෙතත්, එය ස්ථිර කරමින් නීති රීති අනුමත කරන ලෙස අමෙරිකානු අභ්යන්තර ආරක්ෂක දෙපාර්තමේන්තුවට (DHS) එමඟින් නියෝග කර තිබේ.
අමෙරිකානු අභ්යන්තර ආරක්ෂක දෙපාර්තමේන්තුවට විසින් යෝජනා කරන ලද ඩොලර් 103,265 ක ගාස්නුව අද ෆෙඩරල් රෙජිස්ටර් ඔස්සේ අන්තර්ජාලයට මුදා හැර ඇති අතර, එය හෙට (25) නිල වශයෙන් ප්රකාශයට පත් කිරීමට නියමිතය.
ඒ සමඟම දින 30ක මහජන අදහස් දැක්වීමේ කාලසීමාවක් ආරම්භ වන අතර, මෙම වසර අවසන් වන විට නීතිය අවසන් වශයෙන් අනුමත විය හැකිය.
විශේෂිත ක්ෂේත්රවල පුහුණුව ලැබූ විදේශීය සේවකයින් බඳවා ගැනීමට H-1B වැඩසටහන යටතේ වාර්ෂිකව වීසා 65,000ක් ද, උසස් උපාධිධාරීන් සඳහා තවත් වීසා 20,000ක් ද වසර තුනක සිට හයක කාලයක් සඳහා අනුමත කෙරේ.
මීට පෙර විවිධ සාධක මත පදනම්ව ඩොලර් 2,000ත් 5,000ත් අතර මුදලක් වූ මෙම වීසා ගාස්නුව ට්රම්ප්ගේ පරිපාලනය යටතේ මෙලෙස දැවැන්ත ලෙස ඉහළ දමා ඇත.
අමෙරිකානු සේවකයින් වෙනුවට ලාභදායී විදේශීය ශ්රමිකයන් බඳවා ගැනීමට සමාගම් විසින් මෙම H-1B වැඩසටහන අයුතු ලෙස භාවිතා කරන බව ජනපති ට්රම්ප් පවසයි.
එහෙත් සුදුසුකම් ලත් අමෙරිකානු ශ්රමිකයින්ගේ හිඟයට මුහුණ දීමට සහ ඉහළම දක්ෂයින් බඳවා ගැනීමට මෙම වීසා වැඩසටහන අත්යවශ්ය බව ව්යාපාරික සංගම් පෙන්වා දී තිබේ.

















































