අක්රමවත් ජීවන රටාව හේතුවෙන් ලොව පුරා දියවැඩියාව වැළඳීමේ ප්රවණතාව සීඝ්රයෙන් ඉහළ යමින් පවතින බව සෞඛ්ය විශේෂඥයෝ පෙන්වා දී ඇත. එදිනෙදා ජීවිතයේදී සිදුකරන ඇතැම් සාමාන්ය පුරුදු රුධිරයේ සීනි මට්ටම අක්රමවත් කිරීමටත්, ඉන්සියුලින් ප්රතිරෝධය ඇති කිරීමටත් ප්රධාන වශයෙන් බලපාන බව විශේෂ පර්යේෂණයක් මගින් අනාවරණය කර තිබේ.
එලෙස දියවැඩියා අවදානම ඉහළ නංවන දෛනිකව සිදු කරන වැරදි පුරුදු 6ක් පහත පරිදි හඳුනාගෙන ඇත.
01. දිගු වේලාවක් වාඩි වී සිටීම:
දවසේ වැඩි කාලයක් ශාරීරික චලනයකින් තොරව වාඩි වී සිටීමෙන් ශරීරයට ග්ලූකෝස් කාර්යක්ෂමව භාවිත කිරීමට ඇති හැකියාව අඩු වී ඉන්සියුලින් ප්රතිරෝධය (Insulin Resistance) ඇති වේ.
02. ව්යායාම නොකිරීම:
ප්රමාණවත් තරම් ශාරීරික ක්රියාකාරකම් සිදු නොවන විට මාංශ පේශිවලට ශක්තිය ලබා ගැනීමට ඇති අවස්ථා අඩුවේ. නිතිපතා ව්යායාම කිරීමෙන් ඉන්සියුලින් සංවේදීතාව වැඩි දියුණු වේ. දිනපතා සිදුකරන ශාරීරික ව්යායාම මගින් රුධිරයේ ඇති ග්ලූකෝස් කාර්යක්ෂමව පාලනය කරයි. ව්යායාම නොකිරීම නිසා ශරීරයේ ඉන්සියුලින් සංවේදීතාව අඩු වී දියවැඩියා අවදානම වැඩි වේ.
03. ශරීරයේ බර වැඩිවීම:
විශේෂයෙන් උදරය වටා එකතු වන මේදය ඉන්සියුලින් ප්රතිරෝධයට සෘජුවම සම්බන්ධ වන අතර එය පූර්ව දියවැඩියාව වර්ධනය වීමේ අවදානම ඉහළ නංවයි.
04. පවුලේ ඉතිහාසය නොසලකා හැරීම:
පවුලේ සමීපතමයින්ට දියවැඩියාව තිබේ නම්, එමගින් රුධිරයේ සීනි මට්ටම අසාමාන්ය ලෙස ඉහළ යාමේ අවදානම වැඩි වේ. එම නිසා එවැනි පවුල් පසුබිමක් ඇති අය ජීවන රටාව සහ සෞඛ්ය පරීක්ෂණ කෙරෙහි වැඩි අවධානයක් යොමු කළ යුතුය.
05. ප්රමාද වී රාත්රී ආහාර ගැනීම සහ ක්ෂණික/සැකසූ ආහාර පරිභෝජනය:
ප්රමාද වී අධික කැලරි සහිත හෝ සීනි සහිත ආහාර ගැනීම, දුර්වල නින්ද සෞඛ්යයට හානි පමුණුවයි. එසේම බැදපු, සැකසූ සහ පිරිපහදු කළ කාබෝහයිඩ්රේට් බහුල ආහාර මගින් රුධිරයේ සීනි පාලනය අභියෝගයට ලක් කරයි.
06. අධික ලෙස සීනි පරිභෝජනය:
පැණිරස ආහාර, අතුරුපස සහ සීනි සහිත පාන වර්ග නිතිපතා භාවිතය මගින් අතිරික්ත කැලරි ශරීරයට එකතු වී බර වැඩිවීම සහ ඉන්සියුලින් ප්රතිරෝධය ඇතිවීමේ අවදානම වැඩි වේ.
මෙම තත්ත්වයෙන් මිදීම සඳහා දිනපතා සෞඛ්ය සම්පන්න, තන්තු (Fiber) බහුල ආහාර වේලක් ලබාගැනීම, දිනකට අවම වශයෙන් විනාඩි 30වත් ව්යායාමයක නිරත වීම සහ එක දිගට වාඩිවී සිටින කාලය අවම කර නිතර චලනය වීම ඉතා වැදගත් වන බව වෛද්යවරුන් වැඩිදුරටත් පෙන්වා දී ඇත.
