දිවයිනට බලපා ඇති එල් නිනෝ කාලගුණික තත්ත්වය හේතුවෙන් දිස්ත්‍රික්ක 7ක ජනතාවට බලපෑම් එල්ල වී ඇති බව  ආපදා සහන සේවා මධ්‍යස්ථානයේ ජ්‍යේෂ්ඨ සහකාර ලේකම් ප්‍රගීත් ධනංසූරිය මහතා පවසයි.

ඒ අනුව ප්‍රාදේශීය ලේකම් කොට්ඨාස 22කට අයත් පවුල් 25,563ක පුද්ගලයින් 81,605දෙනෙකු වියළි කාලගුණික තත්ත්වය හේතුවෙන් පීඩාවට පත්ව සිටින බව ද ඒ මහතා සඳහන් කළේය.

එල් නිනෝ තත්වය හා ඒ හේතුවෙන් ශ්‍රී ලංකාවට ඇති විය හැකි බලපෑම පිළිබඳ අද (20) පැවති මාධ්‍ය සාකච්ඡාවට එක්වෙමින් ඒ මහතා මේ බව සඳහන් කර සිටියේය.

අම්පාර, පොළොන්නරුව, මඩකලපුව, බදුල්ල, මොනරාගල, හම්බන්තොට සහ රත්නපුර යන දිස්ත්‍රික්කවල ජනතාව මෙම වියළි කාලගුණික තත්ත්වය හේතුවෙන් පීඩාවට පත්ව ඇති බවද ප්‍රගීත් ධනංසූරිය මහතා පැවසීය.

ඔහු වැඩිදුරටත් සඳහන් කර සිටියේ මෙම පීඩාවට පත් ජනතාවට සහන සැලසීම සඳහා අවශ්‍ය මාර්ගෝපදේශ සියලුම දිස්ත්‍රික් ලේකම්වරුන් සහ ප්‍රාදේශීය ලේකම්වරුන් වෙත මේ වන විටත් නිකුත් කර ඇති බවය.

පවතින වියළි කාලගුණය හමුවේ ජනතාවගේ පානීය සහ සනීපාරක්ෂක අවශ්‍යතා වෙනුවෙන් ලබා දෙන ජල ප්‍රමාණය ඉහළ නැංවීමට ද රජය පියවර ගෙන ඇති බව ජ්‍යේෂ්ඨ සහකාර ලේකම්වරයා මෙහිදී පැවසීය.

මීට ඉහතදී දිනකට එක් පුද්ගලයෙකු සඳහා ලීටර් 6ක ජල ප්‍රමාණයක් ලබා දී ඇති අතර එය ප්‍රමාණවත් නොවීම හේතුවෙන් දිනකට ලීටර් 15 බැගින් ජලය ලබා දීමට උපදෙස් ලබා දී ඇති බවද ඒ මහතා මෙහිදී වැඩිදුරටත් සඳහන් කළේය.

යම් ප්‍රදේශයකට ජලය ලබා දීම සම්බන්ධයෙන් තීරණ ගැනීමේ බලය ප්‍රාදේශීය ලේකම්, වෛද්‍ය සෞඛ්‍ය නිලධාරී, මහජන සෞඛ්‍ය පරීක්ෂක සහ ආපදා සහන සේවා නිලධාරීන්ගෙන් සමන්විත කමිටුව වෙත පවරා ඇත.

ජල සහන සැපයීම වෙනුවෙන් මේ වන විට ජල බවුසර් 324 ක් යොදවා ඇති අතර, ඒවා ප්‍රමාණවත් නොවන්නේ නම් පළාත් පාලන ආයතන සහ ආරක්ෂක අංශ සතු ජල බවුසර් ද ලබා ගැනීමට උපදෙස් දී ඇති බව ජ්‍යේෂ්ඨ සහකාර ලේකම් ප්‍රගීත් ධනංසූරිය මහතා වැඩිදුරටත් පැවසීය.

ඒ මහතා සඳහන් කර සිටියේ පවතින වියළි කාලගුණික තත්ත්වයට සහ ඉන් පසුව ඇති විය හැකි අධික වර්ෂාපතනය හේතුවෙන් සිදුවන ආපදාවලට සහන සැලසීමට අයවැයෙන් රුපියල් මිලියන 4,800ක මුදලක් වෙන් කර ඇති බවය.

එමෙන්ම යම් ප්‍රදේශයකට පානීය ජල ගැටලුවක් පවතින්නේ නම්, ඒ පිළිබඳව වහාම අදාළ ප්‍රදේශයේ ග්‍රාම නිලධාරීවරයා දැනුවත් කර අවශ්‍ය සහන ලබා ගන්නා ලෙස ද ඔහු මෙහිදී පැවසීය.