මධ්යම අප්රිකානු ජනරජයේ බටහිර ප්රදේශයේ කැමරූන් දේශසීමාව අසල පිහිටි කුඩා පරිමාණ රන් ආකරයක් කඩා වැටීමෙන් පුද්ගලයින් 100 දෙනෙකුට වැඩි පිරිසක් මිය ගොස් ඇති බව විදෙස් මාධය පවසයි.
මධ්යම අප්රිකානු නගරයක් වන බැබුවා (Baboua) ප්රදේශයේ සිට කිලෝමීටර් 50ක් පමණ දුරින් සහ නැගෙනහිර කැමරූන්හි ගරුවා-බුලායි (Garoua-Boulai) අසල සැම්බෝයේ (Zamboye) ගම්මානයේ මෙම අනතුර සිදුව ඇති බව සඳහන් වේ.
අනතුරින් මියගිය පුද්ගලයින් 100 දෙනෙකුගේ මළ සිරුරු මේ වන විට සොයාගෙන ඇති අතර, තවත් පිරිසක් අතුරුදන් වී ඇති බැවින් මරණ සංඛ්යාව තවදුරටත් ඉහළ යා හැකි බව වාර්තා වේ.
බිම් මට්ටම යටතේ ක්රියාත්මක වූ උමං මාර්ග කිහිපයක් එකවර කඩා වැටීමෙන් මෙම අනතුර සිදුව ඇති බව විමර්ශන මඟින් අනාවරණය වී තිබේ.
රතු කුරුස සංවිධානය සහ ප්රදේශවාසීන් එක්ව මේ වන විටත් අතුරුදන්වූවන් සෙවීමේ සහ සහන සැපයීමේ මෙහෙයුම් අඛණ්ඩව ක්රියාත්මක කර ඇති බව සඳහන් වේ.
රජයේ දැඩි පාලනයකින් තොරව ක්රියාත්මක වන මෙම කුඩා පරිමාණ ආකරවල ප්රමාණවත් ආරක්ෂක විධිවිධාන නොමැති වීම හේතුවෙන් මධ්යම අප්රිකානු ජනරජය තුළ මෙවැනි ඛේදවාචක නිතර වාර්තා වන බව පැවසේ.
