බ්රිතාන්යය පුරා ව්යාප්ත වෙමින් පවතින 'සැල්මොනෙල්ලා' (Salmonella) නමැති ආහාර විෂවීමේ තත්ත්වයක් හේතුවෙන් එක් අයෙකු මියගොස් , තවත් සිය ගණනක් රෝගී වී ඇති බව එරට සෞඛ්ය ආරක්ෂණ ඒජන්සිය (UKHSA) නිවේදනය කරයි.
පර්යේෂකයින් පෙන්වා දෙන්නේ මෙය රට පුරා පැතිර යන වසංගත තත්ත්වයක් බවය.
මෙතෙක් නිල වශයෙන් තහවුරු කර නොමැති වුවද, ආනයනික බිත්තර හෝ බිත්තර අඩංගු ආහාර නිෂ්පාදන මෙම වසංගතයට ප්රධාන හේතුව විය හැකි බවට සැකපළ කරයි.
මෙම ආසාදිතයින් වැඩි පිරිසක් වාර්තා වී ඇත්තේ නිවෙස්වලින් නොව, අවන්හල් සහ කැෆේ වැනි ආහාර සේවා සපයන ස්ථානවලින් ආහාර ගැනීමෙන් බවද අනාවරණය වී ඇත.
සැල්මොනෙල්ලා යනු සතුන්ගේ දිරවීමේ පද්ධතියේ ජීවත් වන බැක්ටීරියාවකි.
මනා ලෙස පිස නොගත් ආහාර, අපවිත්ර ජලය හෝ ආසාදිත සතුන් සමග ගැටීම හරහා මිනිසුන්ට මෙම බැක්ටීරියාව ආසාදනය විය හැකිය.
උදරයේ වේදනාව, පාචනය, වමනය සහ උණ ප්රධාන රෝග ලක්ෂණ වන අතර, ආසාදනය වී පැය 12ත් 72ත් අතර කාලයකදී රෝග ලක්ෂණ මතු වේ.
කුඩා ළදරුවන්, වයෝවෘද්ධ පුද්ගලයින් සහ දුර්වල ප්රතිශක්තිකරණ පද්ධතියක් ඇති අය මෙම රෝගයෙන් බරපතළ ලෙස රෝගාතුර විය හැකි බව සඳහන් වේ.
රෝගීන් 207 දෙනෙකුගෙන් 199 දෙනෙකුම එංගලන්තයෙන් වාර්තා වී ඇත.
ජාන විශ්ලේෂණ පරීක්ෂණ මගින් තහවුරු වී ඇත්තේ මෙම සියලු ආසාදිතයින් එකම බැක්ටීරියා ප්රභේදයකින් රෝගී වී ඇති බවය.
