ඊශ්‍රායල - අමෙරිකා ප්‍රහාරයකින් මියගිය හිටපු ආධ්‍යාත්මික නායක අයතුල්ලා අලි කමේනිගේ මරණය සම්බන්ධයෙන් යුක්තිය ඉටුකරගැනීම ඉරාන රජයේ ප්‍රධානතම යුතුකමක් වී ඇති බව ඉරාන විදෙස් අමාත්‍යංශ ප්‍රකාශකයා පවසයි.
මාධ්‍ය වෙත විශේෂ ප්‍රකාශයක් කරමින් ඔහු කියා සිටියේ, මෙම ඝාතනය ජාත්‍යන්තර නීති රීති උල්ලංඝනය කරමින් සිදු කරන ලද දරුණු අපරාධයක් වන බැවින්, ඊට එරෙහිව නීතිමය සහාය ලබා ගැනීමට සහ අන්තර්ජාතික වේදිකාවලදී කරුණු ගොනු කිරීමට ඉරාන රජය දැනටමත් පියවර ගනිමින් සිටින බවය.
පසුබිම වසර 36කට අධික කාලයක් ඉරානයේ උත්තරීතර නායකත්වය හෙබවූ 86 හැවිරිදි අයතුල්ලා අලි කමේනි, ටෙහෙරාන් නුවර පිහිටි ඔහුගේ නිල නිවාස සංකීර්ණය ඉලක්ක කර ගනිමින් එල්ල වූ ප්‍රහාරයකින් ජීවිතක්ෂයට පත්විය.
මෙම ප්‍රහාරයෙන් කමේනිගේ පවුලේ සාමාජිකයන් කිහිපදෙනෙකු සහ ඉරාන ආරක්ෂක අංශවල ඉහළ පෙළේ ප්‍රධානීන් රැසක්ද මියගියහ.
ඉරාන රජය චෝදනා කරන්නේ මෙම ප්‍රහාරය අමෙරිකානු බුද්ධි තොරතුරු ආධාර ඇතිව ඊශ්‍රායලය විසින් සැලසුම් සහගතව සිදුකරන ලද්දක් බවය.
ජාත්‍යන්තර නීතිමය ක්‍රියාමාර්ග ඉරාන විදේශ අමාත්‍යාංශ ප්‍රකාශකයාට අනුව, මෙම "රාජ්‍ය අනුග්‍රහය ලත් ත්‍රස්තවාදී ක්‍රියාව" සම්බන්ධයෙන් එක්සත් ජාතීන්ගේ සංවිධානය සහ ජාත්‍යන්තර අධිකරණ හමුවට කරුණු ඉදිරිපත් කිරීමට අවශ්‍ය සාක්ෂි මේ වන විටත් සූදානම් කරමින් පවතී.
ඉරානය පවසන්නේ තම රටේ ස්වෛරීභාවය බරපතල ලෙස උල්ලංඝනය කරමින් සිදුකළ මෙම ප්‍රහාරයට වගකිවයුත්තන් නීතිය හමුවට පැමිණවිය යුතු බවය.
මෙම ඛේදනීය සිදුවීමෙන් පසු, ඉරානය පුරා දින 40ක ශෝක කාලයක් ප්‍රකාශයට පත් කෙරුණු අතර, පසුගියදා ඔහුගේ දේහය ඉරානයේ සහ ඉරාකයේ ප්‍රධාන ආගමික නගර කිහිපයකට රැගෙන ගොස් මිලියන සංඛ්‍යාත ජනතාවකගේ සහභාගීත්වයෙන් අවසන් කටයුතු සිදුකෙරුණි.
කමේනිගේ මරණයෙන් පසු ඔහුගේ පුත් අයතුල්ලා මොජ්තබා කමේනි ඉරානයේ නව උත්තරීතර නායකයා ලෙස පත් කර ගනු ලැබීය.
මෙම ඝාතනයත් සමඟ මැදපෙරදිග කලාපයේ පවතින යුදමය වාතාවරණය සහ අමෙරිකා-ඉරාන සෘජු ගැටුම් වඩාත් උග්‍ර අතට හැරී තිබේ.
