පිල්ලෙයාන් ජූලි 24 දක්වා යළි රිමාන්ඩ්
July 13, 2026 02:24 pm
ත්රස්තවාදය වැළැක්වීමේ පනත යටතේ අත්අඩංගුවට ගෙන සිටින හිටපු රාජ්ය අමාත්ය සිවනේසතුරෙයි චන්ද්රකාන්තන් හෙවත් 'පිල්ලෙයාන්' ලබන ජූලි 24 වන දින දක්වා රක්ෂිත බන්ධනාගාර ගත කිරීමට මඩකලපුව මහෙස්ත්රාත් අධිකරණය අද (13) නියෝග කළේය.
වීඩියෝ සම්මන්ත්රණ තාක්ෂණය ඔස්සේ සැකකරු අද දින මඩකලපුව මහෙස්ත්රාත් අධිකරණය හමුවට ඉදිරිපත් කෙරුණු අතර, නඩුව මඩකලපුව මහෙස්ත්රාත් විනිසුරු ඒ. දර්ශිනි මහත්මිය ඉදිරියේ විභාගයට ගැණුනි.
2008 වසරේදී මඩකලපුව දිස්ත්රික්කයේ ප්රදේශ කිහිපයක සිදු වූ මිනීමැරුම් පහක් සම්බන්ධයෙන් අපරාධ පරීක්ෂණ දෙපාර්තමේන්තුව විසින් මාතලේ මහෙස්ත්රාත් අධිකරණයේ ගොනු කර තිබූ නඩුවකට අදාළව මෙම නියෝගය නිකුත් කර ඇත.
මෙම නඩුවේ තුන්වන සැකකරු ලෙස සිවනේසතුරෙයි චන්ද්රකාන්තන් නම් කර තිබේ.
කල්ලඩි ප්රදේශයේ සිදු වූ ඝාතන පහකට අදාළව ගොනු කර ඇති චෝදනා තුනක් සහ තවත් එක් චෝදනාවක් මත අද දින අධිකරණ විභාගය පැවැත්විණි.
අද දින නඩු විභාගය සඳහා සාක්ෂිකරුවන් අධිකරණයේ පෙනී සිටි අතර, සැකකාර පිල්ලෙයාන් වෙනුවෙන් නීතිඥවරුන් දෙදෙනෙකු කරුණු දක්වන ලදී.
අපරාධ පරීක්ෂණ දෙපාර්තමේන්තුව අධිකරණයට දන්වා සිටියේ 2008 වසරේදී T-56 ගිනිඅවි යොදාගෙන සිදු කරන ලද ඝාතන කිහිපයක් සම්බන්ධයෙන් අනාවරණය වූ තොරතුරු මත මෙම නඩු පවරා ඇති බවයි. ඒ අනුව චන්ද්රකාන්තන් නමැත්තා පහත සඳහන් සිදුවීම්වලට සෘජුවම සම්බන්ධ සැකකරුවෙකු ලෙස හඳුනාගෙන ඇත.
2008 ජනවාරි 09- මඩකලපුව කල්ලඩි මුරුගන් කෝවිල අසලදී හිටපු පොලිස් නිලධාරියෙකු ඇතුළු දෙදෙනෙකුට වෙඩි තබා ඝාතනය කිරීම.
2008 මැයි 22 - කාත්තන්කුඩි ප්රධාන මාර්ගයේදී පුද්ගලයන් දෙදෙනෙකුට වෙඩි තබා ඝාතනය කිරීම.
2008 අගෝස්තු 20 - වවුනතීව්, කොතියපුල ප්රදේශයේදී සන්නද්ධ කණ්ඩායමක් විසින් රාත්රී කාලයේදී තවත් පුද්ගලයෙකුට වෙඩි තබා ඝාතනය කිරීම.
ඒ අනුව, සියලු කරුණු සලකා බැලූ මහෙස්ත්රාත්වරිය සැකකරු ජූලි 24 දක්වා තවදුරටත් රිමාන්ඩ් කිරීමට නියෝග කළාය.
මේ අතර, මෙම සිද්ධියටම අදාළ කල්ලඩි ඉඩම් ආරවුලක් සම්බන්ධයෙන් පවතින නඩුව එළඹෙන ඔක්තෝබර් 29 වන දින දක්වා කල් තැබීමටද අධිකරණය පියවර ගත්තේය.
