2026 FIFA ලෝක කුසලාන තරඟාවලියේදී දකුණු අප්‍රිකාව වෙනුවෙන් කැපී පෙනෙන දක්ෂතා දැක්වූ 25 හැවිරිදි සුපිරි පාපන්දු ක්‍රීඩක ජේඩන් ඇඩම්ස් ගේ හදිසි අභාවය සම්බන්ධයෙන් දකුණු අප්‍රිකානු පොලිසිය විශේෂ පරීක්ෂණයක් ආරම්භ කර තිබේ.
කේප් ටවුන් නුවර මධ්‍යයේ පිහිටි ෂොට්ෂෙක්ලූෆ් ප්‍රදේශයේ නිවසක තිබී ඊයේ (11) උදෑසන මෙම තරුණ ක්‍රීඩකයාගේ මළසිරුර සොයාගෙන ඇත.
ජේඩන්ගේ මරණයට හේතුව මෙතෙක් තහවුරු වී නොමැති අතර, ක්‍රීඩා බලධාරීන් මාධ්‍ය සහ මහජනතාවගෙන් ඉල්ලා සිටින්නේ මෙම දුෂ්කර අවස්ථාවේදී පවුලේ අයට සහ මැමෙලොඩි සන්ඩවුන්ස් ක්‍රීඩා සමාජයට අවශ්‍ය පෞද්ගලිකත්වය ලබා දෙන ලෙසයි.
නිල තොරතුරු නියමිත වේලාවට අදාළ අංශ විසින් දැනුම් දෙනු ඇතැයි ද, එතෙක් නිවැරදි නොවන කටකතා ප්‍රචාරය කිරීමෙන් වළකින ලෙස ද ඔවුහු ඉල්ලා සිටිති.
2022 වසරේදී ජාතික කණ්ඩායමට එක්වූ ජේඩන් ඇඩම්ස්, මෙවර ලෝක කුසලාන තරඟාවලියේ චෙක් ජනරජයට එරෙහිව පැවැති තීරණාත්මක තරඟයට ක්‍රීඩා කළේ තරඟය ආරම්භ වීමට පැය කිහිපයකට පෙර තමාට බෙහෙවින් ආදරය කළ මිත්තණිය මියගිය බව දැන දැනමය. පෞද්ගලික වියෝවන් හමුවේ වුවද ඔහු රට වෙනුවෙන් දැක්වූ කැපවීම කාගේත් ඇගයීමට ලක්විය.
දකුණු අප්‍රිකානු පාපන්දු ක්‍රීඩකයින්ගේ සංගමය (SAFPU) ප්‍රකාශ කළේ, ජේඩන්ගේ අකල් වියෝව රටටම පියවිය නොහැකි විශාල පාඩුවක් බවය.
ඔහු සිය වෘත්තීය ක්‍රීඩා දිවිය 'ස්ටෙලන්බොෂ්' (Stellenbosch FC) කණ්ඩායමෙන් ආරම්භ කර ඇත.
2025 ජනවාරි මාසයේදී ඔහු 'මැමෙලොඩි සන්ඩවුන්ස්' කණ්ඩායමට එක්ව ඇති අතර එහිදී ලීග් ශූරතාව සහ අප්‍රිකානු චැම්පියන්ස් ලීග් (CAF) ශූරතාව දිනා ගැනීමට සමත් ව තිබේ.
2023 අප්‍රිකානු කුසලාන අර්ධ අවසන් පූර්ව වටයට පිවිසි දකුණු අප්‍රිකානු කණ්ඩායමේ සාමාජිකයෙකු වූ ඔහු, 2026 ලෝක කුසලානයේදී දකුණු අප්‍රිකාව ඉතිහාසයේ පළමු වතාවට පිළිමළුන් පිටුදැකීමේ (Knockout) වටය වෙත රැගෙන යාමට කැපී පෙනෙන මෙහෙවරක් කළේය.
ජේඩන්ගේ අභාවය වෙනුවෙන් ජාත්‍යන්තර පාපන්දු සම්මේලනයේ සභාපති Gianni Infantino මහතා ද සිය කණගාටුව පළ කර තිබේ.
ඔහුගේ අකල් මරණය හේතුවෙන් ලොව පුරා පාපන්දු ලෝලීන්, සගයන් සහ ක්‍රීඩා සමාජ සිය දැඩි ශෝකය ප්‍රකාශ කරමින් සිටී.
ඇඩම්ස්ගේ උපදේශකයෙකු මාධ්‍ය වෙත පවසා සිටියේ මෙම හදිසි අභාවය පවුලේ අයට සහ මිතුරන්ට අදහාගත නොහැකි කම්පනයක් වී ඇති බවය. ලෝක කුසලානය නිමා කර සිය රටට පැමිණි ඇඩම්ස් ඉතා සතුටින් සහ ඉදිරි තරග වාරය පිළිබඳ දැඩි බලාපොරොත්තුවකින් පසු වූ බව ඔහු පවසා තිබේ.
ජේඩන් ඇඩම්ස්ගේ මරණයට හේතුව මෙතෙක් ප්‍රසිද්ධියට පත් කර නොමැති බව විදෙස් පුවත් පවසයි.
සිය ලෝක කුසලාන සිහිනය සැබෑ කරගෙන සති කිහිපයක් යන්නට මත්තෙන්, දකුණු අප්‍රිකාවේ බලාපොරොත්තු තැබිය හැකි දීප්තිමත් පාපන්දු තරුවක් මෙසේ නිවී ගොස් තිබේ.
