පැයට කිලෝමීටර 200ක පමණ ප්‍රබල වේගයක් සහිතව ශාන්තිකර සාගරයේ වර්ධනය වූ 'බාවි' සුළි කුණාටුව තායිවානය දෙසට ගමන් කරමින් පවතින බව විදෙස් මාධ්‍ය වාර්තා කරයි.
2024 වසරෙන් පසු ආසියා-පැසිෆික් කලාපයට බලපාන ප්‍රබලම සුළි කුණාටුව මෙය විය හැකි බැවින් සූදානම් වන ලෙස බලධාරීන් ජනතාවට දන්වා ඇත.
චීන ජාතික කාලගුණ විද්‍යා මධ්‍යස්ථානය පවසා ඇත්තේ කිලෝමීටර 1,000ක් පමණ තරම් විශාල වට ප්‍රමාණයකින් යුත් මෙම කුණාටුව, එළැඹෙන සෙනසුරාදා සවස චීනයේ නැගෙනහිර ෆුජියෑන් පළාතට ඇතුළු වීමට පෙර උතුරු තායිවානය ආසන්නයෙන් ගමන් කරනු ඇතැයි අපේක්ෂා කෙරේ.
තායිවානයේ කාලගුණ අංශ සඳහන් කර ඇත්තේ, 'බාවි' යනු 1987 වසරෙන් පසු තායිවානයට බලපාන විශාලතම කුණාටුව වන අතර මෑත වසරවලදී මෙතරම් විශාල කුණාටු දැකගත හැක්කේ ඉතා කලාතුරකින් බවය.
දේශගුණික විපර්යාස හේතුවෙන් චීනය, ජපානය සහ තායිවානය මෙවැනි විනාශකාරී කාලගුණික තත්ත්වයන්ට මුහුණ දීමේ ප්‍රවණතාව ඉහළ ගොස් ඇත.
විශේෂයෙන්ම මේ වසරේ පවතින 'එල් නිනෝ' තත්ත්වය හේතුවෙන් සාගර උෂ්ණත්වය ඉහළ යාම මෙවැනි දරුණු සුළි කුණාටු නිතර ඇති වීමට හේතු වී තිබේ.
තායිවාන ජනාධිපති ලායි චින්ග්-ටේ ෆේස්බුක් පණිවුඩයක් නිකුත් කරමින්, දින තුනකට අවශ්‍ය ආහාර, විදුලි පන්දම් ඇතුළු හදිසි ආපදා බෑගයක් (Emergency grab bag) සූදානම් කර තබා ගන්නා ලෙස ජනතාවගෙන් ඉල්ලා ඇත.
ජපාන කාලගුණ විද්‍යා ඒජන්සිය විසින් ඔකිනාවා දූපත් වැසියන්ට දැඩි සුළං, නායයෑම්, ගංවතුර සහ මුහුදු රළ ගොඩගැලීම් පිළිබඳව දැඩි අවධානයෙන් පසුවන ලෙස දන්වා තිබේ.
ලන්ඩනයේ ඉම්පීරියල් විද්‍යාලයේ නිවර්තන සුළි කුණාටු පිළිබඳ පර්යේෂක ෂියැන්ග්බෝ ෆෙන්ග් පවසන්නේ, මෙම කුණාටුව සාගරයේ වැඩි කාලයක් රැඳෙමින් උණුසුම් මුහුදු ජලයෙන් විශාල ශක්තියක් සහ තෙතමනයක් ලබාගෙන ඇති බැවින්, එය ගොඩබිමට කඩා වදින විට සිදුවන විනාශය අතිමහත් (Catastrophic) විය හැකි බවයි.
කුණාටු ගමන් මඟෙහි සිදුවන සුළු වෙනසකින් වුවද විශාල විනාශයක් සිදුවිය හැකි බව ඔහු වැඩිදුරටත් සඳහන් කළේය.
