විශ්වයේ ජීවය පැවතීමට සුදුසු තවත් සුවිශේෂී බාහිර ග්‍රහලෝකයක් සොයා ගැනීමට තාරකා විද්‍යාඥයන් සමත්ව තිබේ.

පෘථිවියේ "ලඟම අසල්වැසියා" ලෙස හඳුන්වනු ලබන මෙම ග්‍රහලෝකය නම් කර ඇත්තේ GJ 3378b යනුවෙනි.

ආලෝක වර්ෂ 25ක් දුරින් මෙය පිහිට ඇති බව සඳහන් වේ.

පිටසක්වල ජීවය සෙවීමේ ගවේෂණවලදී හමුවූ ඉතාමත් බලාපොරොත්තු තැබිය හැකි ග්‍රහලෝකයක් ලෙස මෙය මේ වන විට විද්‍යාඥයන්ගේ දැඩි අවධානයට ලක්ව ඇත.

පෘථිවිය මෙන් දෙගුණයකටත් වඩා විශාලත්වයෙන් යුත් මෙම ග්‍රහලෝකය අයත් වන්නේ Super-Earth ගණයටයි.

මෙය අපට සාපේක්ෂව ආසන්නයෙන් පිහිටි Red Dwarf නම් තරුවක් වටා කක්ෂගතව පවතී.

මෙම සොයාගැනීමේ ඇති විශේෂත්වය වන්නේ ග්‍රහලෝකය පිහිටා ඇත්තේ එම තරුවේ "වාසයට සුදුසු කලාපය" හෙවත් "රන්වන් කලාපය" තුළ වීමයි.

යම් ග්‍රහලෝකයක මතුපිට ද්‍රව ජලය පැවතීමට අවශ්‍ය සුදුසුම උෂ්ණත්වය පවතින්නේ මෙම කලාපය තුළය.

අමෙරිකාවේ ටෙක්සාස්හි මැක්ඩොනල්ඩ් නිරීක්ෂණාගාරයේ පිහිටි මීටර් 10ක් විශාල 'Hobby-Eberly' දුරේක්ෂයේ ඇති 'Habitable-zone Planet Finder' උපකරණය සහ ඇරිසෝනාහි පිහිටි 'WIYN' දුරේක්ෂයේ ඇති 'NEID' වර්ණාවලිමානය ආධාරයෙන් මෙම සොයාගැනීම සිදුකර ඇත.

විද්‍යාඥයන් පවසන්නේ, පෘථිවියට සූර්යයාගෙන් ලැබෙන විකිරණ ප්‍රමාණයෙන් 90%ක්ම මෙම සුපිරි පෘථිවියට එහි මව් තරුවෙන් ලැබෙන අතර, එය ජීවය පැවතීමට ඉතාමත් සුදුසු සමතුලිත මට්ටමක් බවය.

මෙම ග්‍රහලෝකය ජීවයට සුදුසු කලාපයක පිහිටියද, තවමත් විසඳී නොමැති ප්‍රධානතම ගැටලුව වන්නේ "මීට වායුගෝලයක් පවතීද?" යන්න බව සඳහන් වේ.

ග්‍රහලෝකයක මතුපිට තත්ත්වයන් ස්ථාවරව තබා ගැනීමට සහ අභ්‍යවකාශයේ පවතින හානිකර විකිරණවලින් ආරක්ෂා වීමට වායුගෝලයක් අත්‍යවශ්‍ය වේ.

GJ 3378b ග්‍රහලෝකය පිහිටා ඇත්තේ විද්‍යාඥයන් "විශ්වීය වෙරළ තීරය" (Cosmic Shoreline) ලෙස හඳුන්වන සීමාවකය.

එනම්, මව් තරුවෙන් එල්ල වන දැඩි විකිරණ හමුවේ වුවද, ග්‍රහලෝකයේ ගුරුත්වාකර්ෂණ බලයට එහි වායුගෝලය රඳවා තබා ගත හැකිද නැද්ද යන්න තීරණය වන තීරණාත්මක මායිමකය.

විද්‍යාඥ පෝල් රොබට්සන් පෘථිවියේ වායුගෝලයේ ස්වභාවය ඇපල් ගෙඩියකට උපමා කරමින් මෙසේ පැහැදිලි කර තිබේ.

පෘථිවිය ඇපල් ගෙඩියක ප්‍රමාණයට කුඩා කළහොත්, එහි වායුගෝලය ඇපල් ලෙල්ල තරම් තුනී වේ.

ද්‍රව ජලය සහ හුස්ම ගත හැකි වාතය පවත්වා ගැනීමට මෙන්ම අභ්‍යවකාශ විකිරණවලින් ආරක්ෂා වීමට එම ප්‍රමාණය ප්‍රමාණවත්ය.

නමුත් අඟහරු ග්‍රහයා මීට පෙර වායුගෝලයක් තිබී පසුව සූර්ය විකිරණ නිසා එය අහිමි කරගත් ආකාරය අපට මෙහිදී අමතක කළ නොහැක.

මෙම ග්‍රහලෝකයට වායුගෝලයක් පවතින බව තහවුරු කරගැනීම සඳහා ඉදිරියේදී නිපදවීමට නියමිත වඩාත් ප්‍රබල අභ්‍යවකාශ සහ භූගත දුරේක්ෂ නිරීක්ෂණාගාර අවශ්‍ය වනු ඇත.

කැලිෆෝනියා විශ්වවිද්‍යාලයේ ශිෂ්‍යයෙකු වන ගොගොඩ් ජේම්ස් පවසන්නේ, මෙම ග්‍රහලෝකයට නිසි වායුගෝලයක් පවතින බව තහවුරු වුවහොත්, එහි ජීව විද්‍යාත්මක සලකුණු සහ ද්‍රව ජලය පවතීද යන්න පිළිබඳව වැඩිදුර පර්යේෂණ සිදුකිරීමට මඟ පෑදෙනු ඇති බවයි.