ජාතික කලා භවනේ චිත්‍ර 42ක් අස්ථානගතවීම සම්බන්ධයෙන් පොලිසිය සංස්කෘතික කටයුතු දෙපාර්තමේන්තුවේ නිලධාරීන් 7 දෙනෙක් ඇතුළු 15 දෙනෙකුගෙන් ප්‍රකාශ සටහන් කරගෙන තිබේ.

අස්ථානගත වූ එම චිත්‍ර අතර මිල කළ නොහැකි පෞරාණික චිත්‍ර මෙන්ම සිතුවම් කලාව සඳහා මෙරට ප්‍රචලිත වූ 43 කණ්ඩායමේ නිර්මාණ කිහිපයක් ද ඇති බවයි විමර්ශනවලදී අනාවරණ වී ඇත.

ජාතික කලා භවනේ චිත්‍ර 42ක් අස්ථානගත වීමක් පිළිබඳ සංස්කෘතික කටයුතු අමාත්‍ය ආචාර්ය හිනිදුම සුනිල් සෙනවි මහතා පාර්ලිමේන්තුවේදී පසුගියදා අනාවරණ කළේය.

ඒ අනුව මේ සම්බන්ධයෙන් අද දෙරණ සිදුකළ සොයාබැලීමේදී තවත් වැදගත් කරුණු රැසක් අනාවරණ කර ගැනීමට හැකි විය.

එහිදී හෙළිවුණේ, අස්ථානගතව ඇති චිත්‍ර 42 හි සේයාරුවක් හෝ නෙැමැති නිසා ඒවා වෙන් වෙන්ව හඳුනාගැනීමට නොහැකි බවය.

2008 වසරේදී මුද්‍රණය කර ඇති ඇල්බමයකට අනුව එම චිත්‍ර 42න් 14ක් පහසුවෙන් හඳුනාගත හැකි වූවද සෙසු 28 හඳුනාගත නොහැකි බවයි වාර්තා වෙයි.

1987 වසරේදී ජාතික කලා භවනේ තොග භාණ්ඩ ලේඛනයට අනුව එහි චිත්‍ර 42ක් සඳහන් වූවද එම තොග පොතද මේවනවිට අස්ථානගතව පවතී.

එමෙන්ම 2008 වසරේදී සකසන ලද චිත්‍ර ඇල්බමයේ ඇති චිත්‍ර 247න් මේවන විට කලා භවනේ පවතින්නේ චිත්‍ර 233ක් පමණය.

සංස්කෘතික කටයුතු දෙපාර්තමේන්තුවේ අධ්‍යක්ෂවරියක් 2023 වසරේදී කොළඹ දකුණ කොට්ඨාස අපරාධ විමර්ශන කාර්යාංශයට මේ පිළිබඳ සිදුකළ පැමිණිල්ලකට අනුව සිද්ධිය සම්බන්ධයෙන් මේ වන විට විමර්ශනයක් සිදු කෙරේ.

එහෙත් සංස්කෘතික කටයුතු අමාත්‍යාංශය 2025 වසර වනවිටත් මේ සම්බන්ධව කිසිදු පරීක්ෂණයක් සිදුකර නොතිබුණු අතර විෂය භාර අමාත්‍ය ආචාර්ය හිනිදුම සුනිල් සෙනෙවි මහතාගේ උපදෙස්මත බුද්ධශාසන හා ආගමික සංස්කෘතික කටයුතු අමාත්‍යාංශයේ ලේකම්වරයා මේ පිළිබඳ සොයාබැලීමට කමිටුවක් පත්කර ඇතැයි සඳහන්ය.

මේ අතර අස්ථානගතවී ඇති චිත්‍ර අතර මිල කළ නොහැකි පෞරාණික චිත්‍ර රැසක් ද ඇති බවයි වාර්තා වෙයි.

එමෙන්ම විශිෂ්ට නිර්මාණ ශිල්පී ලයනල් වෙන්ඩ්ට් ඇතුළු පිරිසක් විසින් නිර්මාණය කරන ලද 43 කණ්ඩායමේ චිත්‍ර කිහිපයක් හා ඩඩ්ලි සේනානායක මහතාගේ රුව සහිත චිත්‍ර දෙකක්ද ඇති බව පැවසේ.

පොලිසිය සිදුකළ විමර්ශනවලදී හෙළිවී ඇත්තේ, මෙහි පසුගිය කාලයේ නිසි ක්‍රමවේදවලට බැහැරව කටයුතු සිදුව ඇති බවය.

එමෙන්ම සිතුවම් ඇතුළු කලා භාණ්ඩ පිළිබඳ නිසි දත්ත ලේඛනයක් පවත්වාගෙන ගොස් නැතැයි යන්න ද පොලිසිය අනාවරණ කරගත් තවත් කරුණකි.

මෙහි තිබූ චිත්‍ර 63ක් අබලි චිත්‍ර යැයි පවසමින් රුපියල් 1500කට 1999 වසරේදී අලෙවි කර ඇති බව වාර්තා වෙයි.

ඒ පිළිබඳ වගකිවයුතු නිලධාරීන් කිසිවෙක් සතුව කිසිඳු ලියවිල්ලක් නොමැතිවූවත් එම චිත්‍ර බලාගැනීමට සිටි පුද්ගලයා සතුව පමණක් ලියවිල්ලක් ඇති බවත් විමර්ශනවලදී හෙළිවී තිබේ.

එමෙන්ම වෙනත් රටක පැවැති චිත්‍ර ප්‍රදර්ශනයක් සඳහා මෙහි ඇතම් චිත්‍ර රැගෙන ගොස් ඇතත් ඉන් ඇතැම් ඒවා යළි ජාතික කලා භවන වෙත රැගෙනවිත් නැත.

මෙහි නිලධාරීන්ගේ වගකීම් විරහිතභාවය මීට සම්පූර්ණ හේතුවී ඇති බවයි පොලිසිය සඳහන් කරයි.

මේ නිසා මෙහි විමර්ශන සිදුකිරීම ද ඉතා අපහසු බවත් පොලිසිය පැවසීය.

ජාතික කලා භවනේ හිටපු නිලධාරීන්ගේ මෙම ක්‍රියාකලාපය හේතුවෙන් මෙම චිත්‍ර අස්ථානගතවී ඇතිද? විනාශවී ඇතිද? එසේත් නොමැති නම් සොරකම් කර ඇතිද යන්න සොයාගැනීමට දැඩි උත්සාහයක් ගැනීමට පොලිසිය සිදුව තිබේ.