ජංගම දුරකථන අස්ථානගතවීමකදී හෝ සොරකම් කිරීමකදී ගතයුතු ක්‍රියාමාර්ග සම්බන්ධව පොලීසිය විසින් මහජනතාව වෙත දැනුම්දීමක් සිදුකර තිබේ.
නිවේදනයක් නිකුත්කරමින් පොලිස් මාධ්‍ය කොට්ඨාසය විසින් මෙම දැනුම්දීම සිදුකර ඇත.
ජංගම දුරකථන අස්ථානගත වීම, නැතිවීම සහ සොරකම් කිරීමේ සිදුවීම් සම්බන්ධයෙන් දිවයිනේ සෑම පොලිස් ස්ථානයකටම දෛනිකව පැමිණිලි ලැබෙන බව ශ්‍රී ලංකා පොලිසිය පවසයි.
ජංගම දුරකථනයක් වෙනත් පාර්ශවයක අතට පත්වීමෙන් පුද්ගලික තොරතුරු, මූල්‍ය තොරතුරු, ඡායාරූප සහ සංවේදී දත්ත අවභාවිතා කිරීමේ අවදානමක් පවතින බව ද පොලිසිය සඳහන් කරයි.
විශේෂයෙන් සමාජ විරෝධී සහ නීතිවිරෝධී ක්‍රියාකාරකම් සඳහා අස්ථානගත වූ හෝ සොරකම් කරන ලද ජංගම දුරකථන යොදා ගැනීමේ සිදුවීම් වාර්තා වී ඇති බැවින් ජනතාව වඩාත් සැලකිලිමත් විය යුතු බව ද පොලිසිය අවධාරණය කරයි.
ජංගම දුරකථනයක් නැතිවූ හෝ සොරකම් වූ අවස්ථාවකදී පළමුව සිම්පත අක්‍රීය කළ යුතු බවත්, ඒ සඳහා අදාල දුරකථන සේවා සපයන ආයතනය සම්බන්ධ කර ගත හැකි බවත් පොලිසිය පෙන්වා දෙයි.
එමෙන්ම දුරකථනයේ IMEI අංකය වෙනම සටහන් කර තබා ගැනීම වැදගත් බව ද පොලිසිය පවසයි. එම අංකය ලබා ගැනීම සඳහා *#06# කෙටි යෙදුම භාවිත කළ හැකිය.
අස්ථානගත වූ හෝ සොරකම් කරන ලද දුරකථන සොයා ගැනීම සඳහා ශ්‍රී ලංකා පොලිසිය හඳුන්වා දී ඇති “I need” මෘදුකාංග පද්ධතිය භාවිත කළ හැකි අතර, ඒ සඳහා ineed.police.lk වෙබ් අඩවිය හරහා පැමිණිලි ඉදිරිපත් කළ හැකි බව ද දැනුම් දෙයි.
2024 වසරේදී අස්ථානගත වූ ජංගම දුරකථන 2796 ක් සොයාගෙන හිමිකරුවන්ට භාර දීමටත්, සොරකම් කරන ලද දුරකථන 928 ක් සම්බන්ධයෙන් නීතිය ක්‍රියාත්මක කිරීමටත් හැකි වූ බව පොලිසිය සඳහන් කරයි.
එමෙන්ම 2025 වසරේදී අස්ථානගත වූ දුරකථන 2355 ක් සොයාගෙන ඇති අතර, සොරකම් කරන ලද දුරකථන 1019 ක් අත්අඩංගුවට ගෙන නීතිය ක්‍රියාත්මක කර තිබේ.
තමන්ට අයත් නොවන දේපලක් හමු වූ විට එය ළඟම ඇති පොලිස් ස්ථානයකට භාරදීම ජනතාවගේ වගකීමක් බවත්, එසේ නොකළහොත් දණ්ඩ නීති සංග්‍රහය යටතේ සාපරාධී සාවද්‍ය පරිහරණය යන චෝදනාව යටතේ නීතිමය ක්‍රියාමාර්ග ගැනීමේ හැකියාව පවතින බවත් පොලිසිය වැඩිදුරටත් දැනුම් දෙයි.
