රජයේ වෛද්‍ය නිලධාරීන්ගේ සංගමය අද (04) උදෑසන 8.00 සිට දිවයින පුරා පිහිටි රජයේ රෝහල්වල වැඩ වර්ජනයක් ආරම්භ කර තිබේ.
ඒ වෛද්‍යවරුන්ගේ පශ්චාත් සීමාවාසික අනුයුක්ත කිරීමේ ලැයිස්තුව සහ සේවා ස්ථාන මාරු ලැයිස්තුව දේශපාලනීකරණය කිරීමට සෞඛ්‍ය අමාත්‍යවරයා මැදිහත්වන බව පවසමිනි.
මෙම අනීතික හා අත්තනෝමතික ක්‍රියාවන් නිවැරදි කිරීමට සෞඛ්‍ය අමාත්‍යවරයා පියවර නොගැනීම තුළ මෙලෙස යළි වැඩ වර්ජනයකට අවතීරණ වූ බව රජයේ වෛද්‍ය නිලධාරීන්ගේ සංගමය පවසයි.
වෛද්‍යවරු ඉකුත් අඟහරුවාදා සහ බ්‍රහස්පතින්දා දිනවල ද මෙලෙස වැඩ වර්ජනයේ නිරත වූ අතර ඒවා ක්‍රියාත්මක වූයේ එක් දිනකට පමණකි.
වර්ජනය හේතුවෙන් මෙරට සියලුම රජයේ රෝහල් සහ සෞඛ්‍ය ආයතනවල සාමාන්‍ය හා දෛනික ප්‍රතිකාර සම්පූර්ණයෙන්ම ඇනහිටින අතර හදිසි හා අත්‍යවශ්‍ය ප්‍රතිකාර සේවා පමණක් සිදුකරන බව රජයේ වෛද්‍ය නිලධාරීන්ගේ සංගමය සඳහන් කළේය.
ඒ අනුව රජයේ සියලු රෝහල්වල කටයුතුවලට දැඩි බලපෑමක් එල්ල වී ඇති අතර රෝගීන් පත්ව ඇත්තේදැඩි අපහසුතාවකටය.
රජයේ වෛද්‍ය නිලධාරීන්ගේ සංගමය පැවසුවේ වර්ජනය අවසන් කරන දිනය සම්බන්ධයෙන් විධායක සභාව අද (04) දහවල් 12ට රැස්වී තීරණය කරන බවය.
මේ අතර විශේෂඥ වෛද්‍යවරුන්ගේ සංගමය පැවසුවේ රජයේ වෛද්‍ය නිලධාරීන්ගේ සංගමය ආරම්භ කර ඇති වර්ජනයට සහාය ලබා නොදෙන බවය.
එහි ලේකම් විශේෂඥ වෛද්‍ය ආර්. ඥානසේකරම් මහතා සඳහන් කර සිටියේ ඔවුන් සාමාන්‍ය පරිදි සිය රාජකාරී කටයුතු සිදු කරන අතර රෝහල්වල විශේෂ වෛද්‍ය සේවා අඛණ්ඩව පවත්වා ගෙන යන බවය.
එමෙන්ම පශ්චාත් පුහුණු විශේෂඥ වෛද්‍යවරුන් ද මෙම වර්ජනය සඳහා සහාය නොදක්වන බව ඔහු වැඩිදුරටත් සඳහන් කර සිටියේය.
විශේෂඥ වෛද්‍යවරුන්ගේ සංගමය තුළ වෛද්‍යවරුන් 2,300ක් පමණ සිටින අතර සියලු දෙනාම සාමාන්‍ය පරිදි රාජකාරීවල නිරත වන බවත් ප්‍රතිපත්තියක් ලෙස විශේෂඥ වෛද්‍යවරුන් වැඩවර්ජන සඳහා සහභාගී නොවන බවත් ඥානසේකරම් මහතා පැවසීය.
එමෙන්ම ඒ මහතා වැඩිදුරටත් සඳහන් කළේ විශේෂඥ වෛද්‍යවරුන්ට ද විවිධ ගැටලු පවතින නමුත් රෝගී ජීවිත අවදානමේ හෙළා වරජනයේ නිරත වීම සිය ප්‍රතිපත්තියක් නොවන බවය.
එම ගැටලු පිළිබඳව ආණ්ඩුව සමග සාකච්ඡා පවත්වන බවත් සමහර ගැටලු සඳහා මෙතෙක් විසඳුම් ලබා දී නොමැති බවත් එහිදී ඔහු කියා සිටියේය.
