මෙරට අධ්යාපනයේ පරිවර්තනයක් උදෙසා ‘අධ්යාපන කවුන්සිලයක්’ පිහිටුවීමට රජය සූදානම් බව අග්රාමාත්ය සහ අධ්යාපන, උසස් අධ්යාපන හා වෘත්තීය අධ්යාපන අමාත්ය ආචාර්ය හරිනි අමරසූරිය පවසයි.
අධ්යාපන ක්ෂේත්රයේ වෘත්තීය භාවය සහ ගුණාත්මක භාවය සංවර්ධනය කිරීම එම අධ්යාපන කවුන්සිලය පිහිටුවීමේ මූලික අරමුණු දෙක බව ද ඇය පැවසුවාය.
අග්රාමාත්යවරිය මේ බව පැවසුවේ ජාතික අධ්යාපන ආයතනයේ මීගොඩ පිහිටි අධ්යාපන නායකත්ව සංවර්ධන හා කළමණාකර පීඨ ශ්රවණාගාරයේ දී පැවති වැඩසටහනක් අමතමිනි.
2026 වසරේ දී ක්රියාත්මක කිරීමට නියමිත නව අධ්යාපන ප්රතිසංස්කරණයේ දී රජයට අවශ්ය වී ඇත්තේ, හදවතින් ම කැප වී වැඩ කිරීමට හැකි, හොඳ ධාරිතාවක් තිබෙන, අධ්යාපනයේ පංගුකරුවන් සහ සම්පත්දායකයින් බිහි කර ගැනීමට බවද අග්රාමාත්යවරිය ප්රකාශ කළාය.
එහිදී වැඩිදුරටත් අදහස් දැක්වූ අග්රාමාත්යතුමිය,
"අධ්යාපනය වගේ විෂයකදී වෘත්තීය වගකීමෙන් එහාට ගිහින් පුරවැසියෙක් ලෙස පුරවැසි වගකීමකින් කටයුතු කරන්නට අපට සිදු වේවි. එහෙව් අධ්යාපනික පරිවර්තනයක ඉතිහාසය ඔබේ අතින් තමයි ලියැවෙන්නේ. ඒ නිසා නිල වගකීමෙන් එහාට ගිහින් කටයුතු කරන්නට මා ඔබට ආරාධනා කරනවා."
"පොරොන්දු වූ පරිදි ම රාජ්ය සේවයේ ඉහළ ම වැටුප් තල 10 අතරට ගුරු සහ විදුහල්පති ශ්රේණි රැගෙන එන්නට අපිට හැකියාව ලැබී තිබෙනවා. කවුරු කොහොම එක එක තැන්වල කතා කිවුවත් ඇත්ත ඒකයි. මම නැවතත් කියන්නේ අපි ඒ කටයුත්ත කරලා තියෙන්නේ. මුදල් අමාත්යංශය වගේ ම මහා භාණ්ඩාගාරයත් අපට පැහැදිලි ව ඒ බව දැනුම් දීලා තිබෙනවා. වැටුප් විෂමතා ඉවත් කිරීම පිළිබඳ තවදුරටත් ඉදිරියේ දී කටයුතු කරන්නට අපි බලාපොරොත්තු වෙනවා. ඒ පිළිබඳ වැඩිදුරටත් සාකච්ඡා ක්රියාත්මකයි."
"ඒ වගේ ම මේ පද්ධතිය තුළ අවුලක් පවතිනවා කියන එකට අපි සේරම එකඟයි. කොතනින් හරි එය නිවැරැදි විය යුතු යි. එය ක්ෂණික ව කළ හැක්කක් නොවෙයි. ක්රියාවලියක්. හුදු ආණ්ඩුවක් පමණක් මේකට මැදිහත් වීම ප්රමාණවත් නැහැ. පද්ධතිය පරිවර්තනයකට රැගෙන යන්නට නම් අප තුළ ද පරිවර්තනයක් සිදු විය යුතු යි. පද්ධතිය කියන්නේ අපි. අපි පරිවර්තනය වුණොත් පද්ධතිය ඉබේ ම පරිවර්තනය වෙනවා. ඒ සඳහා අධ්යාපන කවුන්සිලය අපි නිර්මාණය කර ගනිමු."
