ගුවන රත්කළ ගුවන් අනතුර - සිරුරු 18ක් සොයාගනී

අමෙරිකානු මගී ප්‍රවාහන ගුවන් යානයක් සහ යුද්ධ හමුදාවේ බ්ලැක්හෝක් හෙලිකොප්ටර් යානයක් උඩුගුවනේ දී එකිනෙක ගැටී සිදු වූ අනතුරෙන් ජීවිතක්ෂයට පත් වූ  පුද්ගලයින් 18 දෙනකුගේ සිරුරු සොයාගෙන තිබේ.

විදෙස් මාධ්‍ය වාර්තා කළේ, අනතුරින් පසුව ගුවන් යානය සහ හෙලිකොප්ටර් යානය වොෂිංටන් ඩී.සී.හි පොටොමැක් ගංගාවට ඇදවැටී ඇති බවය. 

අමෙරිකාවේ වොෂින්ටන් ඩීසී අගනුවර ආසන්නයේ දී ගුවන්යානයක් සහ යුද්ධ හමුදාවට අයත් බ්ලැක්හෝක් වර්ගයේ හෙලිකොප්ටර් යානයක් උඩුගුවනේ දී එකිනෙක ගැටී අනතුරට ලක්ව තිබෙනවා.

විදෙස් මාධ්‍යවලට අනුව මෙලෙස අනතුරට ලක්ව තිබුණේ රේගන් ජාතික ගුවන්තොටුපොළට ගොඩබාමින් සිටි අමෙරිකන් ගුවන් සේවාවට අයත් මගී ප්‍රවාහන ගුවන්යානයකි.

අනතුරින් පසුව දෙකඩවූ ගුවන්යානය සහ, උඩුකුරුවූ හෙලිකොප්ටරය ගංගා ජලය මතට ඇදවැටී තිබුණි.

අමෙරිකානු බලධාරීන් පවසන්නේ කැන්සාස් හි සිට පැමිණි ගුවන් යානයේ මගීන් 60 දෙනෙකු ඇතුළුව පුද්ගලයින් 64 දෙනෙක් සිට ඇති අතර, බ්ලැක්හෝව්ක් හෙලිකොප්ටරයේ කාර්ය මණ්ඩල සාමාජිකයින් තිදෙනෙක් ගමන් කරමින් සිටි බවය.

රාත්‍රී අඳුර සහ කලාපයේ පවතින දැඩි ශීතල හේතුවෙන් මුදාගැනීමේ මෙහෙයුම් අසීරු වී තිබේ.

මේ අතර පවතින හදිසි අවදානම සලකා රේගන් ජාතික ගුවන්තොටුපොළ කටයුතු තාවකාලිකව මුළුමනින්ම අත්හිටුවීමට බලධාරීන් පියවර ගෙන තිබේ.