රුසියාව යුක්‍රේනය ආක්‍රමණය කර අදට දින 5ක් ගතව තිබේ.
යුක්‍රේන ජනාධිපතිවරයා පවසන්නේ ඉදිරි පැය 24 අතිශය තීරණාත්මක බවය.
රුසියාව යුක්‍රේනයේ යුද මෙහෙයුම් ආරම්භ කිරීමෙන් පසු අසීරුතම දිනයට ඊයේ (27) මුහුණ දුන් බව යුක්‍රේන හමුදාව ප්‍රකාශ කළේය.
ඔවුන් සඳහන් කළේ, රුසියානු හමුදා සෑම දිශාවකින්ම දිගින් දිගටම යුක්‍රේනය වෙත ෂෙල් වෙඩි ප්‍රහාර එල්ල කරමින් සිටින බවය.
දරුණු ගැටුම්වලින් පසුව රුසියානු හමුදා යුක්‍රේනයේ දකුණුදිග වරායක් අත්පත් කර ගැනීමට සමත් වී තිබේ.
රුසියාවේ දෙවැනි විශාලතම නගරය වන කාර්කිව් හි නගරයේත් ඊයේ දෙපාර්ශවය අතර දරුණු සටන් ඇවිලී ගියේය.
රුසියානු හමුදා නගරයට ෂෙල් වෙඩි ප්‍රහාර එල්ල කරන අයුරු දැක්වෙන දර්ශන ද මාධ්‍යයට නිකුත් වී තිබුණි.
මේ අතර යුක්‍රේනයේ කියුව් අගනුවරට ඇතුළු වූ රුසියානු සෙබළුන් හා යුක්‍රේන හමුදාව අතර තවදුරටත් ගැටුම් ක්‍රියාත්මකය.
කෙසේවෙතත් ජාත්‍යන්තර විචාරකයින් පවසන්නේ කියුව් අගනුවර අත්පත් කර ගැනීම රුසියාවට පහසු නොවන බවය.
රුසියානු හුමුදාව කියුව් අගනුවරට ඇතුළු වී මේවනවිට දින 03ක් ගතවී ඇති නමුත් ඔවුන්ට තවමත් නගරයේ බලය අල්ලා ගැනීමට හැකිවී නොමැත.
යුක්‍රේන රජය පවසන්නේ සතුරු පාර්ශවයෙන් දිගින් දිගටම ප්‍රහාර එල්ල වෙමින් ඇති නමුත් අගනුවර සම්පූර්ණ පාලනය රජය සතු වන බවය.
මේ අතර රුසියානු හමුදාව විසින් එල්ල කළ මිසයිල ප්‍රහාරයක් සාර්ථකව ව්‍යර්ථ කළ බව ද යුක්‍රේන රජය ප්‍රකාශ කළේය.
එම මිසයිලය රුසියාවට සහය දක්වන බෙලරුසියාවේ සිට යොමු කර ඇති බවට යුක්‍රේනය චෝදනා කර තිබේ.
කෙසේවෙතත් රුසියාව අපේක්ෂා කළ පමනට වඩා යුක්‍රේන හමුදාව මනාව සංවිධාන වී ඇති බැවින් කියුව් අගනුවර අත්පත් කර ගැනීමට රුසියාවට නොහැකිවී ඇති බව විදෙස් මාධ්‍ය වාර්තා කළේය.
යුක්‍රේන හමුදාවෙන් එල්ල වන ප්‍රහාර හමුවේ පහසුවෙන් අගනුවර අල්ලා ගැනීමට නොහැකි බැවින් රුසියානු හමුදාවන් යුක්‍රේනයේ වෙනත් නගර වෙත ඇතුළු වෙමින් ඇති බව ද විදෙස් මාධ්‍ය පවසයි.
කෙසේවෙතත් යුක්‍රේනයේ අගනුවර අල්ලා ගැනීමට නොහැකිවීම හා එල්ල කෙරෙන ප්‍රහාර හමුවේ සිවිල් වැසියන්ට සිදුව ඇති හිරිහැර හේතුවෙන් රුසියානු ජනාධිපති ව්ලැදිමීර් පුටින් දැඩි පීඩනයකට මෙන්ම විවේචනයන්ට ද ලක්වෙමින් ඇතැයි ජාත්‍යන්තර විචාරකයින් පැවසුවේය.
ඔවුන් පවසන්නේ යුක්‍රේනය ඉලක්ක කර ආරම්භ කළ හමුදා මෙහෙයුම අසාර්ථක වුවහොත් රුසියානු ජනාධිපතිවරයාට බලය අහිමි වනු ඇති බව හා ඔහුට සිය අනුප්‍රාප්තිකයා හෝ තෝරාගැනීමට අවස්ථාවක් නොලැබෙනු ඇති බවය.
කෙසේවෙතත් ගැටුම් නතර කිරීම සඳහා සාම ක්‍රියාවලියකට එක්වීමට රුසියාව යුක්‍රේනය වෙත තවත් එක් අවස්ථාවක් ලබාදී තිබේ.
ඒ අනුව බෙලරුස් දේශසීමාවේදී අද සාකච්ඡා පැවැත්වෙනු ඇත.
යුක්‍රේනය මේ තීරණයට එළඹ ඇත්තේ රුසියා ජනපති ව්ලැද්මීර් පුටින් ස්වකීය න්‍යෂ්ටික බළ ඇණියට ප්‍රහාර සඳහා ස්ථානගත වීමේ නියෝගයක් නිකුත් කර ඇති පසුබිමකය.
රුසියානු ජනාධිපති ව්ලැද්මීර් පුටින්,
"බටහිර රටවල් අපේ රටට එරෙහිව මිත්‍රශීලී නොවන ක්‍රියාමාර්ග ගන්නේ ආර්ථික ක්ෂේත්‍රය තුළ පමණක් නොවේ. මම කතා කරන්නේ හැමෝම හොඳින් දන්නා නීතිවිරෝධී සම්බාධක ගැන. නමුත් ප්‍රමුඛ පෙළේ නේටෝ රටවල ඉහළ නිලධාරීන් අපේ රටටත් එරෙහිව ආක්‍රමණශීලී ප්‍රකාශ කරනවා."
රුසියාව වළක්වන බලවේගවලට න්‍යෂ්ටික සහ සාම්ප්‍රදායික යන දෙඅංශයෙන්ම විවිධ උපාය මාර්ගික ආයුධ ඇතුළත් වන අතර ඒවා ආරක්‍ෂාව සහ අපරාධ සඳහා එකසේ භාවිතා කිරීමේ හැකියාව පවතී.
රුසියාවේ පවසන්නේ සතුරු පාර්ශවයන් සැලසුම් කර ඇත්තේ රුසියාවට සහ හිතවාදී්න්ට එරෙහිව න්‍යෂ්ටික අවි භාවිතය සමග යුද්ධයක් කිරීම බවය.
ප්‍රහාර හේතුවෙන් යුක්‍රේන සිවිල් වැසියන් රැසක් ඝාතනයට පත්ව ඇති බවත්, ලක්ෂ තුනකට අධික පිරිසක් රටින් පළා ගොස් ඇති බවත් විදෙස් මාධ්‍ය වැඩිදුරටත් වාර්තා කළේය.
මේ අතර එක්සත් ජාතීන්ගේ ආරක්ෂක මණ්ඩලය අද හදිසි රැස්වීමක් කැඳවා ඇත්තේ රුසියා යුක්‍රේන යුද තත්ත්වය මැඩ පැවැත්වීම සඳහා මහා මණ්ඩලයේ සුවිශේෂ සැසි වාරයක් කැඳවීමේ යෝජනාවක් සම්මත කර ගැනීම සඳහාය.
වැඩිදුර තොරතුරු සඳහා මෙතැනින් පිවිසෙන්න
