ඉන්දියාවේ බුද්ධගයාවට බෞද්ධයින්ගේ පැමිණීම වැළැක්වීම සඳහා ත්රස්තවාදීන් විසින් සිදුකළ ප්රහාරයක් ලෙස අද (07) උදෑසන වූ සිද්ධිය සැලකිය හැකි බව බරණැස විශ්ව විද්යාලයේ අධ්යාපනය හදාරන ශාස්ත්රපති පූජ්ය බෙලිවැවේ සුමනරතන හිමියන් පවසයි.
බෞද්ධ ජනතාවගේ පැමිණීම වැළැක්වීමටත් ඔවුන් බිය ගැන්වීමටත් සිදුකළ ප්රහාරයක් ලෙස එය සැලකිය හැකි බව උන්වහන්සේ අද දෙරණට පැවසීය.
බුද්ධගයාවේ බෝම්බ පුපුරායාමේ අවදානමක් ගැන මීට මාසයකට කලින් ලැබුණු තොරතුරකට අනූව ඉන්දීය බුද්ධිය අංශ විසින් එම ප්රදේශය නිරීක්ෂණය කළ බවද සුමනරතන හිමියන් පැවසුවේය.
මූලික පරීක්ෂණවලට අනූව කහ පැහැති ජැකට්ටුවක් ඇඳගත් පුද්ගලයෙකු අද උදෑසන විහාර පරිශ්රයේ සිට ඇති බැවින් ඒ අනුව පොලීසිය පරීක්ෂණ ආරම්භ කර ඇති බවත් විහාර පරිශ්රයේ ආරක්ෂාව තහවුරු කර ඇති බවත් උන්වහන්සේ වැඩිදුරටත් සඳහන් කළේය.
මේ අතර ඉන්දියාවේ බිහාර් ප්රාන්තයේ බුද්ධගයාවේ මහාබෝධී විහාරය ආසන්නයේ සිදුවු බෝම්බ පිපිරීම් ත්රස්තවාදී ක්රියාවක් බව ඉන්දියාව පවසයි.
ඉන්දීය ස්වදේශ කටයුතු අමාත්යාංශ ලේකම් අනිල් ගෝස්වාමි ඉන්දීය මාධ්ය වෙත පවසා ඇත්තේ මෙම පිපිරීම් සම්බන්ධයෙන් විශේෂ පරීක්ෂණ ආරම්භ කර ඇති බවයි.
අදාළ ප්රහාරය සම්බන්ධයෙන් මෙතෙක් කිසිදු කණ්ඩායමකට චෝදනා එල්ල කළ නොහැකි බවත් පරීක්ෂණ වලින් අනතුරුව ඒ සම්බන්ධයෙන් ප්රකාශයක් සිදුකරන බවත් ඔහු පවසා ඇත.
ඉන්දියාවේ මහාබෝධි විහාරය ආශ්රිතව අද පෙරවරුවේ මෙම බෝම්බ පිපිරීම් මාලාව සිදුවිය.
මෙම පිපිරීම් වලින් සිදුවු කම්පනය හේතුවෙන් විදේශීය බෞද්ධ ස්වාමීන් වහන්සේ දෙනමකට සුළු තුවාල සිදුව තිබේ.
