ඉන්දියාවේ ඇති බුද්ධගයාවේ පාලන අයිතිය බෞද්ධ ජනයාට හිමි විය යුතු බවට නොබෙල් ත්‍යාගලාභී රවින්ද්‍රනාත් තාගෝර් විසින් ලියන ලද ලිපියක් හමුවී තිබේ.

1992 වර්ෂයේ මාත්‍රී භූමි නම් පුවත්පතට ලියන ලද ලිපියක් මෙලෙස හමුවීමත් සමග බුද්ධගයාවේ පාලන අයිතිය පිළිබඳ අතීතයේ පටන් පැවති ගැටලුව නැවතත් මතුවී ඇති බව ඉන්දීය මාධ්‍ය වාර්තා පවසයි.

එකී ලිපිය අනුව සියලුම හින්දු භක්තිකයින් විසින් බුද්ධගයාවේ පාලන අයිතිය බෞද්ධ ජනයා වෙත ලබාදිය යුතු බවට යෝජනා කර තිබේ.

ඉන්දියාවේ පිහිටා ඇති බෞද්ධ සිද්ධස්ථානයක් වන බුද්ධගයාව හින්දු භක්තිකයින්ගේ පාලන අයිතිය යටතේ පවතියි.

මුලදී එහි පාලන අයිතිය 9 දෙනෙකුගෙන් සමන්විත කමිටුවක් සතුව පැවති අතර එම කමිටු සාමාජිකයින් හින්දු භක්තිකයෝ වෙති.

එහිදී බුද්ධගයාවේ අයිතිය තමන්ට ලබාදෙන ලෙස බෞද්ධ ජනයා විසින් දිගින් දිගටම ඉල්ලා සිටි නිසාවෙන් හිටපු ආණ්ඩුකාරවරයෙකු වන ආර්.එස් ගවයි මහතා සහ ආගමික මණ්ඩලය සභාපති වන ආචාර්ය කිෂෝර් කුනාල් නම් දෙදෙනෙකු එක්ව ඊට විසඳුමක් ලබාදිණි.

ගවයිකුනාල් නමින් හැඳින්වෙන එකී විසඳුමට අනුව බුද්ධගයාවේ පාලන අයිතිය සතු කමිටු සාමාජිකයින් 9 දෙනාගෙන් සිව් දෙනෙකු බෞද්ධ වන අතර ඉතිරි කමිටු සාමාජිකයින් 5 දෙනා හින්දු භක්තිකයින් වේ.

එහිදී කමිටුවේ සභාපති ධුරය හින්දු භක්තිකයෙකු විසින් හෙබවූ අතර ලේකම් තනතුර හිමිවූයේ බෞද්ධාගමිකයෙකු හටය.

එහෙත් රවින්ද්‍රනාත් තාගෝර්ගේ ඉහත කී ලිපිය හමුවීමත් සමග බුද්ධගයාවේ සම්පූර්ණ අයිතිය බෞද්ධ ජනයා වෙත ලබාදෙන ලෙසට වන ඉල්ලීමට නව මුහුණුවරක් ලැබී ඇත.

ඒ අනුව පාලන අයිතියට අදාළ කමිටුවේ හින්දු භක්තික සාමාජිකයින් ඉවත් කරන ලෙසට බෞද්ධයින් ඉල්ලා සිටියි.

එසේ වුවද ඉන්දීය රජයේ 1949 සිද්ධස්ථාන පනත යටතේ බුද්ධගයාවේ පාලන අයිතියට හිමිකම් කියනු ලබන කමිටුවේ සාමාජිකත්වය දරණ හින්දු බැතිමතුන් ඉවත් කිරීමට හැකියාවක් නොමැත.

එබැවින් 1949 සිද්ධස්ථාන පනත ඉවත් කළ යුතු බවට ඉන්දියාවේ බෞද්ධ බැතිමතුන් ඉල්ලා සිටින බව ඉන්දීය මාධ්‍ය වැඩිදුරටත් සඳහන් කරයි.