ශ්‍රී ලංකා රාමඤ්ඤ මහ නිකායේ අනුනායක, ගැටඹේ රාජෝපවනාරාමාධිපති අපවත්වී වදාළ පූජ්‍ය කැප්පෙටියාගොඩ සිරිවිමල නාහිමියන්ගේ දේහය පිළිබඳ ආදාහන පූජෝත්සවය, රාජ්‍ය අනුග්‍රහය සහිතව අද (21) පස්වරුවේ ගැටඹේ ක්‍රීඩාංගනයේදී පැවැත්විණි.
දශක 8ක කාලයක් මෙරට ශාසනාභිවෘද්ධිය වෙනුවෙන් නිස්සරණාධ්‍යාසයෙන් උදාර මෙහෙවරක් සිදුකළ උන් වහන්සේ ඉකුත් ඔක්තෝබර් 18 වැනිදා අපවත් වූහ.
ඒ වනවිට 95 හැවිරිදි වියේ පසුවූ සිරිවිමල නාහිමියන්ගේ දේහය ගැටඹේ රාජෝපවනාරාමයේ තැන්පත් කෙරුණු අතර, භික්ෂූන් වහන්සේ, දේශපාලන නියෝජිතයින් ඇතුළු බොහෝ පිරිසක් එහිදී උන්වහන්සේට අවසන් බුහුමන් පුදකළහ.
මෙම අවස්ථාවට අග්‍රමාත්‍ය ආචාර්ය හරිනි අමරසූරියඇතුළු ආණ්ඩු පක්ෂ දේශපාලන නියෝජිතයින්, හිටපු කථානායක කරූ ජයසූරිය, සර්වජන බලය නායක පාර්ලිමේන්තු මන්ත්‍රි දිලිත් ජයවීර මහතා ඇතුළු පිරිසක් සහභාගි වූහ.
ශ්‍රී ලාංකික බෞද්ධ භික්ෂුවට අනන්‍ය ඍජු ගුණයෙන් අසූ වසක් මෙරට ශාසනාලෝක කළ කැප්පෙටියාගොඩ සිරිවිමල අනුනාහිමියන්ට අමාමහ නිවන් සුව!
