අධිකාරියට පත්වීම යනු ගැඹුරු වගකීමක් මෙන්ම නිලධාරීන් කෙරෙහි තබා ඇති විශ්වාසය ද පිළිබිඹු කරන සුවිශේෂී අවස්ථාවක් බව නව නිලධාරීන් අමතමින් ආරක්ෂක ලේකම් එයාර් වයිස් මාර්ෂල් සම්පත් තුයිය කොන්තා (විශ්‍රාමික) මහතා අවධාරණය කරයි.

ඊයේ (16) ත්‍රිකුණාමලය, චීන වරාය පිහිටි ශ්‍රී ලංකා ගුවන් හමුදා විද්‍යා පීඨයේ දී නව ගුවන් හමුදා නිලධාරීන්ගේ විසිරයාමේ පෙළපාළිය සඳහා පැවති උත්සවයේ ප්‍රධාන ආරාධිත අමුත්තා ලෙස එක්වෙමින් ඒ මහතා මේ බව සඳහන් කළේය.

එම අවස්ථාවට පැමිණි ආරක්‍ෂක ලේකම්වරයා ශ්‍රී ලංකා ගුවන් හමුදාපති එයාර් මාර්ෂල් බන්දු එදිරිසිංහ සහ ශ්‍රී ලංකා ගුවන් හමුදා විද්‍යාපීඨයේ පීඨාධිපති එයාර් වයිස් මාර්ෂල් ඩබ්ලිව්.පී. ඒ. එච්. පෙරේරා විසින් පිළිගනු ලැබීය.

මෙම විසිරයාමේ උත්සවයේදී කෙඩෙට් නිලධාරීන් 29 දෙනෙකු සහ කෙඩෙට් නිලධාරිනියන් 14 දෙනෙකු ඇතුළුව කෙඩෙට් නිලධාරීන් 43 දෙනෙකු අධිකාරියට පත්වෙමින් ශ්‍රී ලංකා ගුවන් හමුදාවේ අධිකාරි ලත් නිලධාරීන් සහ නිලධාරීනියන් ලෙස සිය වෘත්තීය ජීවිතය ආරම්භ කරමින් මාතෘ භූමියේ සේවය සඳහා එක්වීම සනිටුහන් විය.

එහිදී වැඩිදුරටත් අදහස් දක්වමින් ත්‍රස්තවාදයට එරෙහි යුද්ධය පැවති සමයේ තමන් අධිකාරියට පත් වූ අත්දැකීමද සිහිපත් කරමින් ඒ මහතා නව නිලධාරීන් හමුවේ පැවසුවේ, තම පවුලේ සාමාජිකයින් සහ ආදරණීයයන් ඉදිරියේ උත්කර්ශවත් විසිරයාමේ පෙළපාළියකින් අධිකාරියට පත්වීමේ අවස්ථාව හිමිවීම එම නිලධාරීන්ට හිමි වූ භාග්‍යයක් බවය.

එමෙන්ම වෙනස් වෙමින් පවතින ජාතික ආරක්ෂක අභියෝග වලට සාර්ථකව මුහුණ දීම සඳහා වෘත්තීය විශිෂ්ටත්වය, අඛණ්ඩ ඉගෙනීම, තාක්ෂණික වෙනස්කම්වලට අනුර්වර්තනය වීමේ හැකියාව, අවංක භාවය, සදාචාරාත්මක බව සහ ධෛර්යය අත්‍යවශ්‍ය බව ද ආරක්ෂක ලේකම්වරයා පෙන්වා දුන්නේය.

ආපදා අවස්ථා වලදී ගුවන් හමුදාව ඉටුකරන වැදගත් කාර්යභාරය ද අවධාරණය කළ ඔහු, සිය වෘත්තීය ජීවිතය පුරා ආණ්ඩුක්‍රම ව්‍යවස්ථාවට සහ නීතියේ ආධිපත්‍යයට ගරු කරමින් ඉහළම වෘත්තීය හැසිරීම් ප්‍රමිතීන් ආරක්ෂා කරන ලෙස නව නිලධාරීන්ගෙන් ඉල් සිටියේය.

මෙම විසිරයාමේ පෙළපාළිය මගින් ශ්‍රී ලංකා ගුවන් හමුදාවේ 65 වන, 67 වන සහ 69 වන පාඨමාලා මෙන්ම 21 වන කාන්තා පාඨමාලාවට අයත් කෙඩෙට් නිලධාරීන් ද, ජෙනරල් ශ්‍රීමත් ජෝන් කොතලාවල ආරක්ෂක විශ්ව විද්‍යාලයේ (KDU) 37 වන, 39 වන සහ 40 වන පාඨමාලාවන්ට අයත් කෙඩෙට් නිලධාරීන් ද පුහුණුව සාර්ථකව අවසන් කිරීම සනිටුහන් විය.

මෙම අවස්ථාවට හිටපු ගුවන් හමුදාපතිවරුන්, ගුවන් හමුදා මාණ්ඩලික ප්‍රධානි, ගුවන් හමුදා කළමනා කරණ මණ්ඩලයේ සාමාජිකයින්, රාජ්‍යතාන්ත්‍රික නියෝජිතයින්, ආරාධිත අමුත්තන්, අධිකාරියට පත් වූ නව නිලධාරීන්ගේ දෙමාපියන් සහ පවුලේ සාමාජිකයින් මෙන්ම ගුවන් හමුදා සාමාජිකයින් විශාල පිරිසක් ද සහභාගී වූහ.