මාර්ග ගත ක්රමය ඔස්සේ යම් පුද්ගලයෙකුට ක්ෂණින ණය මුදලක් ලබාගැනීමට අවශ්යතාවයක් තිබේ නම් අදාළ ආයතනය විසින් දක්වා ඇති කොන්දේසි සම්බන්ධයෙන් හරියාකාර අවබෝධයක් ඇතිව ණය පහසුකම් ලබාගන්නා ලෙසට පොලීසිය මහජනතාවට දැනුම් දෙයි.
එමගින් සිදු විය හැකි අපහසුතාවය මඟ හරවා ගැනීමට හා මූල්ය අලාභයන් වළක්වා ගැනීමට හැකියාව පවතින බව පොලීසිය පනේවා දෙයි.
අන්තර්ජාලය භාවිතා කරමින් සමාජ මාධ්ය තුල දැන්වීම් පල කර ජංගම දුරකථන යෙදවුම් මඟින් මාර්ග ගත ක්රමය ඔස්සේ ක්ෂණික ණය ලබාගැනීමේ ක්රමවේදයක් සම්බන්ධයෙන් අපරාධ පරීක්ෂණ දෙපාර්තමේන්තුවේ මූල්ය අපරාධ විමර්ශන කොට්ඨාසය මගින් විමර්ශන ආරම්භ කර ඇත.
ඒ, මෙම ආකාරයට ණය මුදල් ලබා ගනු ලබන ගනුදෙනුකරුවන් ඔවුන් විසින් එසේ ලබාගත් ක්ෂණික ණය ආපසු ගෙවීමේදී ඉහළ පොලී අනුපාතයක් යටතේ ණය වාරික අය කර ගනිමින් ගනුදෙනුකරුවන් අපහසුතාවයට පත්වන ආකාරයට එම ආයතන කටයුතු කරන බවට ලද තොරතුරු අනුවයි.
එම විමර්ශනයට අනුව ණය ගැණුම්කරුවන් අදාළ ආයතන වෙතින් ණය ලබා ගැනීමේදී ණය ලබා ගන්නා පුද්ගලයින් ආයතන කොන්දේසි පිළිබඳව නිසි අවබෝධයකින් තොරව ණය ලබා ගැනීම සිදුකිරීම හේතුවෙන් මෙලෙස අපහසුතාවයට පත්ව ඇති බව නිරීක්ෂණය වී තිබේ.
මෙම ආයතන දක්වා ඇති කොන්දේසිවල ණය මුදල් ආපසු අය කර ගන්නා ආකාරය සම්බන්ධව හා මෙම යෙදවුම් භාවිතයෙන් ඇතිවිය හැකි සියලු අවදානම් සම්පූර්ණයෙන්ම ණය ගැනුම්කරු විසින් දැරිය යුතු බවට පැහැදිලිව සඳහන් කර ඇති බව පොලීසිය පෙන්වා දෙයි.
ඒ අනුව ණය ලබාගන්නා පුද්ගලයන් විසින් නිසි පරිදි කොන්දේසි කියවීමකින් හා නිවැරදි අවබෝධයකින් තොරව මෙම යෙදවුම් ස්ථාපිත කර ණය ගැනීමට කටයුතු කර ඇති බවට වැඩි දුරටත් නිරික්ෂණය වී ඇති බව සඳහන් වේ.
එබැවින් මාර්ග ගත ක්රමය ඔස්සේ ණය මුදල් ලබා ගැනීමේදී පුද්ගලයින් විසින් සැලකිලිමත්ව හා නිසි අවබෝධයෙන් කටයුතු කිරීම තුලින් සිදු වන අපහසුතාවයන් මග හරවා ගැනීමට හැකි වන අතර ඉහත කරුණු සම්බන්ධයෙන් දැනුවත්ව සිටින ලෙසට පොලිසිය මහජන්තාවගෙන් ඉල්ලා සිටී.
