'දිට්වා' හේතුවෙන් දැඩි ලෙස හානි වූ මෙරට කිලෝමීටර් 600ක මාර්ග ප්‍රතිසංස්කරණය කිරීම සඳහා ලෝක බැංකුව විසින් අමෙරිකානු ඩොලර් මිලියන 110ක මුදලක් අනුමත කර තිබේ.

ජාත්‍යන්තර සංවර්ධන සංගමයේ අර්බුද ප්‍රතිචාර වැඩසටහන යටතේ මෙම මූල්‍ය පහසුකම ලැබී ඇත.

සුළි කුණාටුවෙන් දැඩි ලෙස බලපෑමට ලක් වූ ප්‍රජාවන්ට වෙළෙඳපොළ, පාසල් සහ සෞඛ්‍ය සේවා වෙත ප්‍රවේශය යථා තත්ත්වයට පත් කිරීම සඳහා අවශ්‍ය මාර්ග ප්‍රතිසංස්කරණයට මෙහිදී ප්‍රමුඛතාව ලබාදේ.

ප්‍රතිසංස්කරණය කෙරෙන මාර්ග දේශගුණික විපර්යාසවලට ඔරොත්තු දෙන ප්‍රමිතීන්ට අනුව ඉදිකිරීමට සැලසුම් කර ඇති අතර, වැඩිදියුණු කළ ජලාපවහන පද්ධති, නායයෑම් වැළැක්වීමේ ක්‍රමවේද සහ නව ඉංජිනේරු තාක්ෂණයන් ඊට ඇතුළත්ය.

මෙම නව මූල්‍ය පහසුකම හරහා දැනට ක්‍රියාත්මක වන Inclusive Connectivity and Development ව්‍යාපෘතිය තවත් වසර 3කින් දීර්ඝ කිරීමට නියමිත අතර, ඒ අනුව එම ව්‍යාපෘතිය යටතේ ශ්‍රී ලංකාවේ ප්‍රවාහන සම්බන්ධතා සඳහා ලෝක බැංකුව සිදුකරන සමස්ත ආයෝජනය අමෙරිකානු ඩොලර් මිලියන 610ක් දක්වා ඉහළ යනු ඇත.

මෙම ආයෝජනයෙන් පුද්ගලයින් 830,000කට අධික පිරිසකට සෘජු ප්‍රතිලාභ හිමිවන අතර, දිස්ත්‍රික්ක 8ක පුද්ගලයින් මිලියන 2කට ආසන්න පිරිසක් වෙත එහි ප්‍රතිලාභ ළඟාවනු ඇතැයි ලෝක බැංකුව පවසයි.

මාර්ග ප්‍රතිසංස්කරණ සහ නඩත්තු කටයුතු හරහා නව රැකියා සහ වැඩිදියුණු කළ රැකියා අවස්ථා 5,671ක් පමණ නිර්මාණය කිරීමටද අපේක්ෂිතය.

එමෙන්ම තේ, එළවළු සහ වී ගොවීන් 22,000කට ආසන්න පිරිසකට ගැනුම්කරුවන් සහ සැපයුම් දාම සමඟ යළි සම්බන්ධ වීමට මෙම ව්‍යාපෘතිය හරහා අවස්ථාව සැලසෙනු ඇත.

2025 වසරේ නොවැම්බර් මාසයේදී ශ්‍රී ලංකාවට බලපෑ සුළි කුණාටු දිට්වා හේතුවෙන් අමෙරිකානු ඩොලර් බිලියන 4.1ක පමණ හානියක් සිදුව ඇති අතර, දිස්ත්‍රික්ක 25 පුරා පුද්ගලයින් මිලියන 2කට ආසන්න පිරිසකට බලපෑම් එල්ලවිය.

ප්‍රවාහන ක්ෂේත්‍රයට සිදුව ඇති හානිය අමෙරිකානු ඩොලර් මිලියන 973ක් පමණ වන අතර, පළාත් මාර්ග කිලෝමීටර් 2,000කට ආසන්න ප්‍රමාණයක්, ග්‍රාමීය මාර්ග කිලෝමීටර් 3,500කට වැඩි ප්‍රමාණයක් සහ පාලම් 700කට ආසන්න සංඛ්‍යාවක් ඊට ඇතුළත් වේ.

ප්‍රවාහන ක්ෂේත්‍රයේ යථා තත්ත්වයට පත් කිරීම සඳහා අවශ්‍ය මුදල අමෙරිකානු ඩොලර් බිලියන 1.31ක් ලෙස ඇස්තමේන්තු කර තිබේ.